Piše: Alfred Šaina

Pred neko vreme Općine Matulji ukinut je status brdske-planinske općini, tj. ukinut je zakon po ken smo svrstani va brdsko-planinsko područje, a zahvaljujuć kemu je bilo par miljunčići više va općinsken takujine, a bome i va našen, aš smo dobivali povrat poreza i imeli još se neke olakšice. Čuda judi se je podsmehevalo da kakova smo mi to brdska općina, a teli bimo i izlaz na more. Bili smo, i to imamo jušto zahvalit Lisine, velemu šumskemu području, većinon smešćenemu na području naše općini.
Najprej da definiramo ki je to teritorij kega zovemo Lisina. To je šire područje okol istoimenega vrha visokega 1185 metar, inače drugega po veličine, aš najveća je Šija ili Gomila z 1234 metri visini. Iako je teško odredit ko je to točno područje, aš neki ga tako zove, neki ne, moremo reć da područje Lisini počinje zgora napušćenega sela Čonjini, po sjevernoj padine Beljača preko Maleh i Veleh Sapci i Črnega vrha do Vodičke griži i cesti Veprinac-Lanišće, pa okol Šije zgora Žejan do Kolivrata. Onput po ceste Zvoneća-Mune do „Bukvini“ (nekadajne senokoši zgora Perki) i od tamo zad Škrapnu, Krivu, Zdemer do zgora Kućel.
Sam naziv Lisina je stara hrvacka beseda, a označava veći planinski proplanak z livadami i senokošami. Toponimi „Lisina“ dosta je čest va seh hrvackeg planinskeh područjeh, ma pul nas kad se reče „Lisina“ većine judi prva asocijacija je nekadajni planinarski dom „Stanko Jurdana“ i livadi okol njega. Pa počnimo od tega brižnega doma od kega samega bi se moglo čuda napisat.
Dom je storen 1915. leta, va vreme 1. sveckega rata, kad su naši kraji još bili pod Austrijun, a delali su ga zarobjeni ruski soldati. Prva namjena bila mu je lugarnica. Potla 2. sveckega rata, tamo negder pedeseteh let kuća je obnovjena, a na obnove su delali najveć omladinci z Rukavca i Zvoneće. Dograjen je del kade je bila kuhinja, storen je tarac i boćarija.
Iako je imel status planinarskega doma, (a i reklo se je vavek „Dom v Lisine“) našen juden je više služil kot oštarija, preko šetemani delafcon ki su delevali po šumah, a preko vikenda juden ki su prišli po zime skijat, po lete na izlet va prirodu, na puhi, po lukići, majugi, al pak po dreva za teplit se. Užanca j’ bila va dome se fermat, ko ne pojist maneštru onda baren popit kvartin vina. Malo nedej je pasalo, a da se ni „rastegnulo“ armuniku, al gitaru. I veli Matetić Ronjgov piše svojmu prijatelu Zvanetu Jardasu kako mu je najdraže po nedeje poć z vlakon do Matuj, pak hodeć do Lisini kade zemja i rožice najlepče diše. Za nazad preko Zdemera kade je z oštaricun zakantal „po starinsku“ pak nazad na vlak i v Reku.
Čuda veselja i čuda vina proteklo je mej zidi sada zapušćenega doma. Ni tema, a ni mesto ni vreme da ovdeka analiziramo ki je kriv za takavo stanje, a jas neću reć ča mislin, aš ionako mi je zajik brži od mozga, a potla me ni voja branit se od lažnjivci ki bi prvi morali samo istinu govorit. Uglavnom: Niki ni kriv, ni država ka ni jasno definirala takovi objekti, ni trdoglafci va opatijsken planinarsken društve ki su se sudili z općinun okol vlasništva, a znali su da će zgubit, ni općina ka ni imela pravu inicjativu i poticaj, ni judi ken se grusti auto oblatit, ni oštari ken je poslovanje vavek nerentabilno. Niki, pa boh. Ma, da ne finin okol doma baš pesimistično, moran reć da je novi prostorni plan Općini Matulji predvidjel obnovu i proširenje ovega objekta, postoji i jedan vrlo lep i ambiciozan projekt, ali… Vavek je ali. Ali prej sega morat će se rešit baren tri stvari: ki će va to investirat, asfaltirat cestu i rešit problem ča je sadašnji objekt izgrađen va dve katastarske općini (stari del je K.O. Zvoneća, a dograjeni del K.O. Kućeli). Po sadašnjeh zakoneh objekt ne more bit va dve k.o. pak će se morat ili objekt dislocrat, ale malo pomovit, al pak z Zagreba iskat posebnu dozvolu, ča je isto moguće, samo ča mi nimamo stričeve i kumove po ministarstveh pa gre to malo teže.

LISINA NEKAD

Ne postoji baš puno zapisi i dokumenti od prošlosti ovega područja, ali su ostali živi spomeniki ljudskemu delu i trudu ki se još dan danas lepo vide na saken korake proti Lisine. Područje Lisini je bilo jako važan privredni resurs pogotovo va zadnjeh tristotinjak let od kad se j’ počne povećavat broj stanovniki ki se moraju od mora se više širi proti zgorun. Zato su i naselja uz rub Lisini relativno mlada, osim Mun, Žejan i Rukavca. More se reć da je Lisina odvavek služila kako izvor dreva kot sirovini i za teplit se i kako letnji planinski pašnjak za ovce keh je moralo na oven područje bit relativno puno, a od česa nan svedoče brojni suhozidi i ograjeni dolci. Moramo ovde reć da se područje Lisini još naziva Kastavska šuma, a čak se lovište i dan danas tako zove. Razlog je to ča je ovo područje pripadalo kastavskoj gospoštije, odnosno kapitanatu ki je imel sjedište va Kastve ki je bil upravni i administrativni centar kamo se je hodilo po dozvoli za seču i za košnju. Napoleonovi soldati, odnosno francuska uprava storili su fanj reda va upravljanje z šumami, a uveli su i zemljišnje knjigi tako da intenzivneja eksploatacija šum počinje baš nekako va to vreme. Velik del šum dan je na privatno korištenje ko je bilo i te kako kontrolirano, a del šumi na područje zgora današnjega doma ostal je va općinsken, odnosno državnen vlasništve. Šuma je korištena vrlo racionalno. Tanjo drevo koristilo se je za sakidajne potrebi (i po njega su najveć ženske hodile, al z plašćanicami, al z vozićen), za kuhat i teplit se, malo debjo za proizvodnju krbuna ki je bil značajan izvor soldi, aš se je krbun z lisinskeh krbunic prodaval v Reku i Opatiju, a ono najdebjo je šlo va industrijske svrhi. Krbunice su se često delale po Lisine. Bilo je to teško delo, normalno, seklo se je i pililo na ruki, a onda po dve šetemani bilo dan i noć uz krbunicu dokla je gorela. Krbun se je zipejeval z vozi keh su vukli konji, al voli. Za to su rabile i cesti pak su postepeno urejene i ceste od keh del i danaska služi za promet. Prva cesta v Lisinu storena je krajen 18. stoleća i bila je to cesta Žnjidari – Zdemer – Kriva – Lisina (preko Osojnice). Z Škrapni su šli dva puti, jedan ki je danaska cesta i drugi preko Starega brega pod Oblelicu. Po ten pute je sada spejana voda za Lisinu i daje za Mune i Žejane. Put i sad postojeći šal je od Kućel preko Čonjin i spod Volarij se je spojil na put ki je šal od Rukavca otprilike uz današnju cestu. Drugi put z Rukavca je šal od spod Perčić do Volarij. On je i danas dosta dobro očuvan i na njin se lepo vidi ondašnja tehnika izgradnji kolskeh puti.
Današnja cesta Rukavac – Lisina storena je okol 1930. leta za vreme Italije. Za ono vreme je to bila vrlo kvalitetno storena cesta ka se je i kvalitetno održavala (govore da puno boje nego danas), a trasirana je tako da su usponi čin blaži. Na nekoliko mesti je presekla staru cestu ka je tako zgubila svoje značenje. Stari kolski puti storeni su, pak na trase nekadajnjeh ofčarskeh puti po keh su Rukavčani i Zvonećani gonili ofce va goru na letnju pašu. Ovčarstvo se je va Lisine zadržalo do početka 20. stoleća, a onda se je postepeno pasalo na kravi sporadi mleka ko je trebalo brzo rastućoj Opatije. Kot uspomena na ofce i lisinski pastiri ostali su ograjeni dolci i suhozidi ki su služili za mužnju i strižnju i brojni dvorići keh se i sada najde lep broj. Na žalost, koliko znan, samo dva su spašeni od potpune devastacije zahvaljujuć gospodaron ki su na dobu slamni krov zamenili z plehon i žlepci. Jedan je va Črnen dole, a drugi va Volarijah. Dvorići su još kakovu takovu funkciju imeli do potla 2. sveckega rata, a služili su kot skladište za orudje i sklonište od nevremena pastiron, koscen, al drvosječan. Inače su to jednostavne jednoprostorne prizemne građevine. Va prizemlje izgrađenen od suhozida i poluobrađenega kamika bila je prostorija ka je služila kot zaklon za judi i blago. Ulaz je bil obrnjen proti suncu, a zgora je bil prostor za skladište veja – vejnica i to na gredah i daskah, a zgora pokrivena z slamun. Do gornje prostorije je bila storena ili prirodna rampa po koj se je z vozićon prišlo blizu vrati i nutar se j’ klalo seno i veje ko se je pomalo potla znašalo doma. Dvorići je bilo više na Zvonejsku stran i to zato aš su se Zvonećani naselili na ovo područje kot ovčari. Ma ovac, već sto let ni, dvorići su zrušeni, a zadnja krbunica je storena 1984. leta i to na zvonejsku stran. Moglo bi se, uvjetno, reć da se krbunice nisu definitivno zatrle, aš se z lisinsken drevon dan danas na Munah dela krbun.
Na nekoliko mesti uz cestu još postoje fundamenti od kuć tkz. „financi“ kade su talijanski financi strogo kontrolirali ki, ča i koliko peja z šumi doma.
Prišal je i nesretni 2. svecki rat, a v Lisine opet živo. Talijani su zgora Čonjin va Volarijah storili kazermu za 150 soldati, a okol Zvoneće dosta bunkeri aš su računali da će to bit zadnja linija obrani. Vojni objekti su bili vrlo kvalitetno storeni tako da ih je većina i danas cela i interesantna za pogledat. Lisina je bila i prva baza partizani zapadne Kastavšćini, a i istarski partizani imeli su svoji logori, čak i bolnicu na područje Lisini. Tu je ubijen i Stanko Jurdana kot prvi partizan z našega kraja. Od tega vremena svedoči nekoliko spomeniki, a sakako je za pohvalit da je Općina Matulji uredila i obnovila veli spomenik blizu doma.
Potla rata stočarstvo je počelo naglo stagnirat, krbunice se već ne delaju, judi su počeli delat v Reke i v Opatije i naša je Lisina postala uglavnon turističko vikend odredište. V Lisinu su prihajali planinari, izletnici, lofci, domaći kad su šli va drva, al retki ki su još kosili. Vavek je nekega bilo čut. Leta nazada bilo je više snega pak se je saku zimo v Lisinu hodilo skijat. Malo je skijaši srednje generacije ki nisu v Lisine prvi put stali na skije. Legendarni učitelj je bil pokojni Mio Ambrožić, a mane još dan danas va uhe zvoni kako je zijal na nas: “kolena, kolena tovare“! Neki će se spametit da je Lisina imela i svoju žičaru i to „Tomos“. Ne pametin jušto kako je bila storena samo znan da je imela narančasti špag za kega smo se ćapali i ki nas je pomalo vukal do vrha rebri. Pred malo san bil na „lisinsken skijalište“. Nekadajna strma senokoša zarasla je i danas se po ničeren ne bi moglo reć da je tu užalo stotinjak judi skijat. Mokri i premržnjeni si su se narivali va dom kade su se teplili z kuhanen vinon, uz, normalno, armuniku. Po škuren i opuzlen nazad zdolun. Fićoti da su najboje držali cestu, ma ako je i ziletel ki ni bilo škodi aš je zakramal va dubok sneh uz cestu.
Po lete, znalo se je, prva nedeja va aguste. Pic-nic! Auto moto društvo organiziralo je na jednoj livade zgora doma pic-nic na ken je užalo prit i preko tisuću judi. Više od roštilja bili su štimani pilići na ražnje ki su se pekli pod „budnen okon“ pokojnega Lojzota Viškanića. A nebog Branko Mihov, i on je pokojni, bil je zadužen za kapulu rezat. Plakal je kot mići otrok, a neku dobu kad ga je „prezelo“ i zaspraven. Pijača se je hladila z ledon kega su pripejali z fabriki sardin va Ikoj. Igral se je nogomet, potezal se je špag, vozilo se je z motori po trave, jako se je kantalo i drugi dan bolovalo. Ja, ma snega više ni, skijat hodimo va Taliju, malo je i livadic za pic-nic. Auto-moto je ostalo, samo društva već ni.
Sedandeseteh let pasanega stoleća Zvonećani i Škrapnjaki su počeli prodavat tereni na keh se je dozvolila gradnja vikendic. Lisina je dobila i svoje prvo „vikend stanovništvo“. To vikend naselje zaslužno je ča Lisina još živi i ča još neč malo judi pride na friški lisinski zrak.