Piše: Alfred Šaina

Danaska malo ki zna za ovistu parolu, a pod kun je polovicun šezdeseteh let održan prosvjedni skup va školskoj dvorane pul Matuj. A organizator je bil, ni manje ni više, leh Socijalistički savez radnog naroda Hrvatske – Matulji. Ni to bila mića stvar da jedna komunistička organizacija organizira protestni skup va države va koj su si morali jednako „mislet“. Kapac da njin je dobro „zakuhalo“ aš da j prišlo toliko judi da nisu si ni stali va dvoranu. Skoro da san već pozabil na ta skup da mi ni ov dan prišla opet pod ruku knjiga „Istinita spoved“ ku je napisal i o svojmu trošku izdal moj dragi i veli prijatel, na žalost pokojni Ivo Baćić – Ivo Baćo. Malo j tiskano primjerki i zato san jako srećan ča mi ju j Baćo svojni regalal z besedami: „Evo ti, aš ti si nem kot i jas“. Ov dan san ju dal pročitat jenemu prijatelu aš je i on redikul na svoj simpatičan način i prez dlak na zajike kot je i pokojni Baćo bil. Opet san se stavil čitat aš ni za verovat kako neke stvari pred petnajst let napisane moru bit kot da se sada dogajaju. Posebno me je zasrbel njegov članak kade piše kako Preluk povijesno i moralno pripada općine Matulji aš je odvavek bil del naselja i županije Matulji. Danaska kad se to reče više spodabja nekakovoj zajebancije pak se si uglavnon sprdaju na račun „matujskega mora“.
Povijesni dokumenti keh iman govore da to ni zajebancija i da se more jako lahko dokazat da del Preluka pripada Matujan. Kako vidimo šezdeseteh let su Matujci još vavek držali Preluk za svoj. Devedeseteh let pred formiranje općini Matulji postojalo je obećanje (z figun va žepe) od ondašnjeh moćniki z Reki i Opatije da će se poštovat stare granice. Rogi! Prevareni su bili Matujci kot i čuda puti. Baćo i to spominje aš je bil na sastankeh kade je to obećano, a i ja san na svoje uši čul kako su Linić i Luttenberger zafrkavali našega načelnika na ta račun. Ne verujen da će se više nikad ispravit ta povijesna nepravda. Morda će van opet opet pred kakovemi izbori to obećevat kot i dom v Lisine. Ne verujte njin, ka got stranka bila. Pak onput neka se baren zna zač se reče da j Preluk matujski. Rekal san sam sebe: napisat ću pa magari san kot brek ki na mesečinu laje. Doduše, dosta ukratko, aš dokumentacija je preopširna da se more va ovisti text stavit. Najveći del dokumentacije dal mi je prof. Klaudio Jelenić, na čen san mu jako zahvalan, a ki je bil mej naivnemi (ča se j potla pokazalo) lokalpatrioti ki su provali se izborit da se del Preluka dobije nazada. Del tega san dobil i od dragega prijatela Ozrena ki kot jazbac rova po arhiveh pak mi to pošaje aš zna da me to „srbi“.

Katastarski nacrt Preluka

Katastarski nacrt Preluka

Najprvo, okol imena. Ov dan su se jako karali na FB okol tega je Preluk, al Preluka. Mi rečemo Preluk, magari se va stareh spiseh spominje ime Preluka, ča će reć da more bit i jedno i drugo. Današnji Preluk, nekadajna Preluka pri se put va dokumenteh spominje kot Abbati St. Jacobi at Preluccam, al po našu Opatija Sv. Jakova kod Preluke. Bil je kastavska luka va ku su pristajali brodi i va koj se je lovila riba. Kastav je bil podeljen na županije, odnosno porezne općini pa je tako središnji del Preluka spadal pod županiju Matulji, a kuće ke su tamo bile imele su matujski kućni broji. Zapadni del Preluka, cirka od kade je bil ulaz va nekadajni Milde sorte, a danas jutra va novi hotel Navis, pak proti Voloskemu je bil Vološkanski, a istočni del Preluka, cirka od plaži va kampe pak do plaži pul vili spadal je pod Rubeši.
Provajmo zamislet Preluk pred 150 let! Na meste kade j kava teren se je blago spušćal proti moru, a po širokeh ravnah pasle su ovce. Zada vele kući ka je još živa ,na prostore ki se je zval Sadina bili su vinogradi. Pod kuću i proti Voloskemu par kućic va keh su živele ribarske familije. Provali smo utvrdit ki je i zač storil tu velu kuću, ma za sada još ne znamo. Postoje indicije da je to bil kloštar va ken su bili rečki augustinci ki su imeli pravo na ribolov, a proizvodili su i dosta vina. Pred nekoliko let kada je kuća rekonstruirana delavci su našli zasipanu velu vinsku konobu, ka je, na žalost, opet zasipana i to zavavek. Va vreme kada je bila kava aktivna va njoj su bivali šefi. Obični delavci su spali va barakah. Vreme Italije je to bila kazerma od financi, a va rate su va njoj boravili i Nemci ki su ju devastirali kad su morali ća bežat. Potla rata, judi ken su kuće bile vreme rata unišćene, dobili su dozvolu da moru zet žlepci, gredi i poneštri s kuće i tako je veći i stareji del kući propal. Va dograjenen dele su bili stani pak je ostal sačuvan. Ta dograjeni del isto ima svoju interesantnu povijest. Nosil je kućni broj Matulji 1, a vlasnik je bil Ivan Minak, brodograditelj i brodovlasnik. Ova kuća ve Preluke je storena 1843. leta. On je storil i novu vilu va Črnikovice . Njegovi su nasledniki i daje bili vlasniki te kući, a ča se vidi va sudskeh spiseh od parnice ku je 1910. leta pokrenula Općina Kastav va ime porezne općini Matulji radi portuna kega su Minakovi stavili na javni put ki gre od cesti Volosko – Rijeka prema kamenolomu.

Katastarski nacrt Preluka s ucrtanom granicom

Katastarski nacrt Preluka s ucrtanom granicom

To je cesta ka je već dosta let zarašćena, a još malo pak njoj neće ni traga bit. Va sudsken spore Minaka je zastupal dr. Gjuro Červar, a općinu dr. Matko Laginja. Postignuli su vansudsku nagodbu i Ivan Minak (sin Ivanov) je moral portun maknut. Bilo je to na čestice 1620/119, a vlasnik je bila porezna općina Matulji. Mesto na ken je bil portun zvalo se je Potoki, ča će reć da je tuda nekad nekakov potok tekal, a čigovi ostanki se vide pul mora, a danaska služe za biri hladit. Va to vreme grajena je cesta uz more, a delal ju je građevinski poduzetnik Alberto Širola, a onput su najvjerovatneje zrušene i ribarske kući ke su bile na meste kade se danaska vide ostanki tribin za moto utrki. Opstala je jedino jedna uz more ka je isto čuda let propadala, al je početkon 70-teh let pasanega stoleća obnovljena od strani člani matujskega ribolovnega društva.

KAVA

Va drugoj polovice 19. stoleća Reka je spadala pod Mađarsku, a koj je luka krvavo rabila. Zato pokreću za ono vreme strašansku investiciju za zgradit luku ka će bit z železnicun povezana z Bečon i Budimpeštun. Otpira se nekoliko kamenolomi od keh su najveći bili Prelučki i na Kantride. Prvi put va povijeste našega kraja zaposlilo se je čuda judi od keh je vela većina prvi put šla delat za soldi. Prej nego su kavi počele delat storen je precizan plan od kuda do kuda će se kopat i storen je spisak seh vlasniki kako privatneh particeli tako i komunala. S tega spiska vidi se da je vlasnik dela komunala porezna općina Matulji, a drugega dela porezna općina Rubeši. Najveć su to bili pašnjaki, a kava je „pojila“ i dve cestice po keh su matujski i rubešovi pastiri i ribari prihajali do mora. Si vlasniki particel su obeštećeni. Su bili zadovojni z onen ča su dobili danaska ne znamo, ma bi reć da su aš se ni nijedan bunil, a moramo znat da je va to vreme ovčarstvo već pomalo zamrlo, a saki solad je dobro prišal. Od same kavi bi se moglo još dosta tega reć ma to je već tema za se. Ostanimo mi na kunfineh. Potla ča je rečka luka zgrajena delo va kave ni posensega zamrlo. Kamik se j nastavil eksploatirat, najveć za izgradnju noveh cesti ke se intenzivno delaju, a otprte su i nove kavi: na Kuke i kade je pokle Berger storen, a koncesionar je bil Ivan Franković od Rubeš kbr. 26, domaći čovek. Stareji judi i danas te kavi zovu Frankovićeve kavi. Potla Frankovića koncesionari su tvrtka Gregersen i Shwarz.
Zadnju koncesiju su potpisali 1.1. 1916. za Preluk i to z Općinun Kastav pod ku su spadali Matulji, a se skupa je propalo pofin Prvega sveckega rata. Va to vreme va Preluke je rojeno i dvoje dece, a njin je va krsnen liste navedeno da su rojeni va Preluke, općina Matulji.

GRANIČNA CRTA

Pak da vidimo kuda je pasevala ta famozna matujska granica va Preluke. Kot san i rekal na istočnoj strane graničila je z poreznun općinun Rubeši, a granica je počela na najisturenejoj grote pul plaži va kampe, onda je šla proti današnjoj ceste i negdere po njoj do zgradi nekadajnega diska (LP, F1, Valentino) pak zada nje dijagonalno preko parkinga od HAK-a i onda zgorun do negdere mej Berger i Panoramu i onda zgorun po cestice kade je i dan danas granica. Na zapadnoj strane san već napisal da je bilo okol ulaza va nekadajni Milde sorte.
Granična crta se po prvi put menja 1920. leta nakon talijanske okupacije kada se uspostavja Slobodna država Rijeka. Granica je šla po rube kavi, a kade je i dan danas. Potla ča je ukinjena Slobodna država Rijeka međunarodna komisija sastavjena od predstavniki Kraljevini Italije i Kraljevini SHS utvrđuje novu (boje rečeno potvrđuje staru) granicu na područje Preluka, a to je od današnje nove dizalice, pod mostić pod cestun i po rube kavi na cestu i onda desno do kamene kući vis a vis Panorami ka je bila na talijanskoj strane i va njoj su bili Guardia di finanza. To je bila državna granica, a općinske granice su još vavek ostale stare, ča će reć da je del Preluka od vele kući do Milde sorte još vavek spadal pod Matulji. Općina Volosca – Abbazia namislela je proširit svoj teritorij i to tako da zame jedan kus Općine Matulji i jedan kus Općine Veprinac. Z uspostavun noveh općinskeh granic moral se j složit Consiglio comunale, općinski savjet, a va ken je bilo od 24 judi, 23 domaći i 1 Talijan.

Stari Preluk

Stari Preluk

Da ne navodin imena seh, spomenut ću samo da je predsednik bil Vjekoslav (Lojzo) Sinčić. Sjednica je održana 6.6.1925. i na njoj je bilo 18 općinskeh zastupniki (savjetniki). Općina Volosca-Abbazia je još 30.12.1923. iskala proširenje općinskeh granic po linije ceste po koj je vozil tranvaj, a jedan od razlogi je bil da se električna centrala za tranvaj nalazi va Volosken. Svoj zahtijev ponovili su 3.4.1924. i to prema općine Matulji i prema Leprincu od kega su iskali poreznu i katastarsku općinu Vasanska. Zahtijev je upućen i va Rim nacionalnoj vlade. Navode da su z uspostavun nove državne granice Matulji proširili svoj teritorij aš su dobili del Rubeši, Trinajstići, Pobri, Perenići i Bregi – Anjeli pa bi pofin tega se trebali odreć dela svojga teritorija ko po nekoj njihoj logike gravitira Voloskemu. Matujski općinski savjetniki su kroz vrlo živu raspravu naveli niz argumenti da ne postoji apsolutno nikakov razlog da se Volosko-Opatija proširi na del matujskega teritorija. Na glasanje je 16 od 18 bilo protiv da se ustupi del matujskega teritorija uključujuć i Preluk. Protiv su bili predstavnik Zvoneće Franjo Kinkela i predstavnik Brezi Franjo Matetić. Dobivena je bitka, ma ne i rat, aš Opatija nastavja delat pritisak na vladu va Rime ka napokon 13.12.1931. leta prnaša odluku po koj se del teritorija Općini Matulji i del teritorija Općini Veprinac priključuje općine Opatija. Tako je Preluk zgubjen. Najbrže zavavek! Nova hrvatska vlast ni imela ni imela sluha, a još manje voji da se nepravda z Rima ispravi. Nekoliko matujskeh lokalpatrioti provalo je skupit dokumentaciju i dokazat da Preluk pripada povijesno i moralno Matujan ma nisu uspjeli. Semogući mići bogi v Reke i Opatije su ih još i podjebavali da bi oteli kot Bosanci imet izlaz na more.
Morda va celoj štorije postoji, mane osobno, neč jako nejasno. 1984. leta osnovano je SRD „Preluk“ Matulji i va izdanen rješenje piše da j područje djelovanja lučica Preluk u Mjesnoj zajednici „Bregi-Matulji-Rukavac“. Daje, va Narodneh novinah broj 13 od 1983. leta objavjena je Odluka o izmjeni i dopuni odluke o lukama i korištenju luka na podrčju općine Opatija i va članke 2. piše da se Mala luka Preluk daje na korištinje Mjesnoj zajednici „Bregi-Matulji-Rukavac“.
Matujci su Preluk vavek držali za svoj. I dan danas je tako. Magari drugi odlučuju od njega i korist pobiraju. Ja mislin da ni dugo dan kad ćemo i bez tega ostat, a za poć se va Preluk kupat ćemo morat biljet kupit. Samo neka znaju da je oteto prokjeto!

Preluk tunera

   Preluk tunera

Preluk, održavanje utrke

Preluk, održavanje utrke