Tanto smo jih promenili! Neka gredu svragu! Dosti su z nami vladali! Sada ćemo mi š njimi! Kjuč maškaran! Kjuč juden ki umeju, vole i žele! Maškare će storit pravega reda, aš se ne zna ki kega…ni zada ni spreda! Si bi upravjali z judi, a judi su i bez soldi i dela ostali. Sami sobun ne umemo na kraj, pa će nan kapac Europa prnest raj! Ma će vrnića prnest! Nimamo prasac va koce,a ne smemo ni broskvi sadit va dolce! Ni Sovjak neće zet, aš imaju dosti i svojeh smet!
Nisu radi dali vlast, ne! Ni oni, ni ovi! Si su jednaki! Preduboko su njin riti va poltroni potonule! Ne razumeju oni običnega, mićega, maškaranega čoveka. Leh su tuliko šušurali pusni judi, da ni bilo druge leh pomolat i popustit maškaranoj voje!
A onput se j’ i rog oglasil. Tulil je z se duši! Tulil da zbudi svoj lepi kraj i oglasi da j’ počel najlepči i najnemeji štajon va lete! Čuli su se rogi i od Saršoni, Marčeji, od Dovičić, z Kuta i Smokvarije. Počele su pusne užanci! Hodit ćemo na maškarani tanci! Oživelo je ovo vreme kad je se nemo! Maškarani judi prišli su semo!Obesili su i pusta na pal, pak neka čeka dokle mu sudnji dan bude arival.
I potla sega tega šušura na Brege, maškare su šle zbudit halubajska mesta. Va saken kantuniće antonjskega Halubja dočekani su judi od maškar, zdigalo se pusta, veselilo i matačilo, kantalo, da se užanca drži sen se je do znanja dalo!
Antonjski rog je sako toliko zatulil, maškare su kantale, a muzika je žižgala dugo va noć. Pusni judi veselili su se još jenemu veselemu pusnemu štajonu!

Autorica: Nina Dukić Srok