Najprej da vidimo ki j’ ta Svetac kega „slave“ i onisti ki ne hode h maše saku šetemanu. Postoje dva Sveta Antona, a da bimo ih mogli razlikovat imaju i svoji pridefki. Ovisti od kega danas povedamo dobil je pridevak Pustinjak i slavimo ga na 17. antonšćaka ale jenara, a of drugi je Padovanski i njegov blagdan je na 13. iIvanjskega ale juna. Oba dva su život posvetili molitve i Bogu, Pustinjak još tamo va trećen stoleće, a Padovanski skoro pa tisuću let kašneje, a kako mu je grob va Padove prozvan je Padovanski magari je rojen va Portugale. Anton Pustinjak je živel na područje Egipta i kako smo rekli živel je skromno i va molitve. Puno kašneje osnovan je i red Antoniti ki su va srednjen vijeke imeli dosta velik utjecaj. Dali su veli doprinos va lečenje zarazneh boli pak su dobili privilegiju da njihi prasci moru slobodno past po komunale. Da bi se moglo ralikovat njihi prasci od drugeh prasac, imeli su okol vrata zvončić. Kad su se počeli formirat svetački kulti Sveti Anton Pustinjak je uz svoj lik dobil 3 simboli: prašćića z zvoncon okol vrata, pasa ki sibolizira demoni ki su ga progonili i oganj kako simbol boli od ke je i sam boloval, a to je kožna bol herpes zoster, a ka se je dobivala kad su judi jili raž na koj su bile otrovne gljivice ke su izazvale promjeni na kože. Pofin sega tega Anton Pustinjak je postal svetac za kega judi veruju da njin čuva blago, a isto tako „zadužen“ je za lečenje i zaštitu od kožneh boli.
Naš kraj je va prošloste bil uglavnon stočarski, odnosno ovce su bile osnova preživjavanja uz jako extenzivnu poljoprivredu isključivo za svoje potrebi. Zvoneća je, kot ča je poznato, nastala kot naselje judi z dolnjega našega kraja ki su se pofin ovac počeli širit proti zgorun. Kako j selo jako naraslo prišla j potreba storit i cimiter i crekav. Zvonećani su zato iskali da njiha crekav bude posvećena Svetemu Antonu Pustinjaku kako zaštitniku blaga od kega su živeli. To njin je udovoljeno pak je od polovice 19. Stoleća na Zvonećoj crekva na čast temu svecu. Va našen kraje je još i va Šapjanah crekav, a pul Jurčić kapelica posvećena temu svecu , va kastavskoj crekve je i kip Svetega Antona, a zna se da ni bilo dvora i štali va koj ni visela slika zaštitnika blaga. Pak kakova je veza tega sveca s Puston? Skoro pa nikakova, samo se to danaska jako malo zna. Ale sa pak ne oteje znat.

zvoneća

Zvoneća

 

Samo vreme Pusta va katoličken kalendare ne postoji. Ali postoji jedan nepisani sporazum, a kega crekav poštuje i na pusne nemotarije gleda tako da malo zažmi na oba dva oka tisti dni. Tr, ionako će to vaje finit i opet ćemo bit dobri kršćani ki se z popelon po glave posipamo i kajemo za si grehi ki smo opuste storili. To vreme se računa od Trih kralji do Pepelnice. Pred malo san pročital jako zanimljivu izjavu jednega teologa ki je rekal kako su judi „zbog svojih požudnih strasti“ zapravo crekve „ukrali“ dva dana, odnosno blagdana, aš se nemit počne već na sami Tri kraji, a nemi se i na Pepelnicu, magari bi ta dan trebalo bit se gotovo i z poston počet vreme korizmi. Danaska je činjenica da smo si globalno selo i dostupnost sake informacije pripejala do tega da smo počeli „hodočastit“ na Žejane na Tri kraji, a mediji to prikažuju kot stoletnu tradiciju, a zapravo dura malo manj leh dvajsetak let. Stoletna tradicija su zvončari ki su na čast trih kraji šli zvonit po sele tri krugi, a šli su radi verovanja da će njin leto bit bojo. Z drugemi besedami, povezali su stari poganski kult zvonjenja z kršćansken blagdanon . Na Munah su pak čekali iz poštovanja prema kršćanskoj vere da kršćanski blagdan pasa pak su onda z zvoni senjali početak pusneh dnevi. Neč slično je bilo i z Antonjun.
Prej drugega sveckega rata ni nijedan poveževal Pust i Antonju . Antonja j bila strogo crkveni blagdan, najprej za Zvonećani. Na ta dan prihajali su h maše na Zvoneću i njih rod, a i drugi judi, najveć z Rukavca, ma i z drugeh dolnjeh kraji. Ki put je i sneg zapal pak su morali i prespat na Zvonećoj.

sv.antun-pustinjak

kip Svetega Antona Pustinjaka va kastavskoj crekve

Potla drugega rata, judi su se malo oslobodili. Ni već bilo straha od represiji ku su njin fašisti delali, magari su još i komunisti vraga delali i provali stare užanci zatrt pak su se i užanci prilagodile novemu vremenu. Po povedanje još živeh judi ki su va to vreme mladići bili, jušto va to vreme Antonja i Pust su povezani va „brak“ ki i dan danas dura. Pul Matuj je jedna kumpanija mladić ki su bili onako, bimo rekli, dosta slobodnega ponašanja, sebe nazvala „ESEVU“ , a ča je u stvari bila skraćenica od talijanskega „squadra volante“, ale po domaći „leteći odred“. Oni su zaspraven bili „leteći“. Bilo ih je sagdere kade got se j ča dogajalo. Tako su arivali i na Zvoneću i to z šupemi rogi. Od svojeh stareh čuli su da se tuleć va šupi rog Pusta „zove“. Užanca j va našen kraje bila da se najprej odbavi kršćansku dužnost na čast Svetega Antona pak onda neka norije počnu. Zato su šli na Zvoneću na Antonju večer i počeli su potla maši va rog tulit. I tako j to duralo dosta let. Onako, po domaću, mej svojmi judi. Va to vreme ženskan ni bilo primereno poć na Zvoneću. Govori mi Marijana Kalčić Grlaš, ka je jur mlada, da nju mat pokojna ni pustila na Zvoneću aš da zgorun hode samo ženske dvojbenega morala.
Bil san otrok, ma se dobro pametin kada san tamo krajen šezdeseteh let prvi put šal na Zvoneću, na Antonju. Bila j nedeja i smo šli „užancu storit“ pokojni barba Davor kemu su roditelji bili z Zvoneće i Škrapne, moj otac ki je delal va Elektroprenose pak je imel neki kolegi gore i jas ki san, kako san potla čuda let shvatil, bil poslan šnjimi kot „osigurač“. Va belen fićote kemu su se vrata na napred otpirala. Najprej smo obašli Davorov rod, a onda smo šli Dušaniću ki je z mojen ocon delal. Njin su sagder rivali lonac z vinon, a mane bumboni. Se ča smo šli bliže večeru mane su bumboni se manje šli, a njin je pak vino s teh lonac se lepče teklo. Zaspal san va nečigovoj kuće pul špargeta, a zbudil san se doma kad su me va posteju nesli.
Hodilo se j tako na Zvoneću, obać rod i prijateli. Zvonećani, judi kot kruh dobri, vavek su čekali z kumbasicami i kiselen kapuzon. I z lonci vina. Pilo se j z lonca. Za prci ni nijedan maril, a lonac je dobar i zato aš nijedan ne vidi kakov ti j gut. To se j se obidovalo najveć po kućah, al pak po konobah i garažah. Pače, garaži su storene kada su kravi vanka zignali, a nutar parkirali auti.
Globalizacija, informatizacija, internetizacija i se neč na „zacija“ zdignuli su Zvoneću na jedan visok škalin. Prevelik da se samo selo š njin nosi. Videla j to i općina, pak znan da je i Boro Babić z općini dobil kakov sivi vlas kad je toliko judi na Zvoneću prišlo da j nastal prometni kolaps kot va Njujorke. Storili su Zvonećani i šator aš konobi po keh se j pilo su postale premiće. Novi zakoni vezani z većun kontrolun pijaneh po ceste, a još više i činjenica da se j Antonja počela slavit i va Viškove i va Kastve i va Frlanije i pul Matuj i po Liburnije od Lovrana do Opatije opet je Zvoneću hitila va „drugi plan“. Zato je dobro da se mladi Zvonećani trude okol organizacije Antonje, aš ako ćemo pravo, fešte je mesto tamo kade njoj je koren.
Nedostatak tradicije va teh dolnjeh mesteh činil je da prezamu od onuda kade j koren. A to je Zvoneća! Pul Matuj se je počela Antonja držat pred četrdesetak let. Jeno vreme su i zvončari okole hodili, a pusna muzika je, potla ča su Pusta pul Matuj obesili šla na Volosko pak v Opatiju i do Lovrana kade su ih gjedali kot puhi kad njih posvetiš va oče. Danaska i oni imaju „Antonju“. A ča reć? Neka njin je, tr tako i tako te govorit do ko leto da j to stoletna tradicija. Moreš mislet!

I tako, malo po malo pretvorili smo Svetega Antona va „pusnega sveca“. Čudno da se ni nijedan još spametil proglasit ga zaštitnikom od zvončari kad mu već prašćić ki mu vavek pul nog stoji ima zvonac. Antonja, nekadajni zvonejski kršćanski blagdan do kega su pofin svojga blaga, jako držali postal je pusni blagdan. Jedino ča ih povežuje je ono narodno ime : Sveti Anton od prasac, a teh prasac nan se ne fali tega dneva.

Alfred Šaina, ob Antonje 2015. leta