Alfred Šaina, na staro 2014. leto.

Treda tako mora bit. Neke naše stare užanci se pomalo zatiru, a neke s z vremenon menjaju i bimo rekli prilagode tako da malo al skoro niš već nimaju z starun užancun nego samo ime i još morda malo ča. Jedna takova stara užanca je i DOBRA RUKA. Stran imena ono ča j od starini ostalo je i to čemu zaspraven služi „dobra ruka“, a to je darovanje dece na Mlado leto. Ne pozabimo da se deca još daruju i za Uskrs, svojni z šišoron, a danaska z čokoladnemi jaji, pak za Mikulovu s kakovun igračkun, najveć pak za rojendan, a za „dobru ruku“ postala je užanca dece dat soldi. Pak, videjmo malo otkuda ta užanca i ča se j’ se va tolika leta promenilo.
Najprvo moran reć da „dobra ruka“ ni samo naša lokalna užanca. Poznaju ju i od Dalmacije do Slovenije, a jako je usko povezana z koledvami. Ono ča razlikuje koledvi i „dobru ruku“ je vaprven rede dob dece ka se uz tu užancu vežuju i dan kada se održava. Danaska se koledvi vežuju najveć na Tri kraji, a svojni se j’ koledvalo već od prvega dana mladega leta, a „dobra ruka“ se vavek dava na Mlado, ale Novo leto, na prvi jenara. „Dobra ruka“ se j pobirala po sele, a pobirat su šla isključivo muška deca od najmanje 5 do najveć 10 let. Kad su navršili 10 let više nisu pobirali „dobru ruku“ nego sušli isti dan po kućah z „mlajemi koledvači“. Tako j užanca bila da mlaji, ča će reć od 10 do 15 let gredu na mlado leto, a oni stareji od 15-tak let na Tri kraji. Da se ne širimo z štorijun previše, a moran ča i za drugi put pustit, of put ćemo se zadržat samo na „dobroj ruke“.
Inšoma, kako san rekal, „dobru ruku“ su pobirala po sele na prvi jenara muška deca stara mej pet i deset let. Otpravili su se va grupica hod okol pet, šest njih, jutro već okol osme uri i su šli od kući do kući. Poroštali bi po vrateh, a kada njin je parona otprla va jedan glas bi rekli:

Dobri Božići, dobri blagdani!
Mir i zdravje!
Dajte nan dobru ruku!

Parona njin se je zahvalila, podala njin (va staro vreme) kakovu jabuku, orehi, al olešnjaki i rekla „da bite i kletu prišli“. Verovalo se j’ da to kuće nosi sreću. Ja, znan ja da su još Feničani zmisleli soldi, ma va našeh krajeh ih ni bilo ki zna ča. Tr ni ni danaska, ma va ono vreme to ni bila stvar samo mizerije leh ono ča čuda puti pozabimo, a to je da su judi najveći živeli od robne razmjeni, a soldi je bilo jako malo va opticaje. Komać va drugoj polovice 19. stoleća naši su judi počeli hodit na javna dela kade su za svojo delo dobili kakov solad. I tako, kako su pomalo soldi prihajali tako se j’ dece počelo davat za „dobru ruku“ kakov solad, a nekako va to vreme su počele naranče i cikulati bit poznate va našeh krajeh, a ča su najveć mlekarice kupovale v Opatije i v Reke pak su se deca i temu veselila ako njin je ki dal. Opolne, kad su obašli selo, jedan va grupe je podelil se ča su po kućah nabrali na jednaki broj deli koliko ih je bilo pak su veseli šli doma na obed.
Ja san imel tu sreću da san bil mej zadnjemi generacijami ka j po sele hodila pobirat „dobru ruku“. Bilo je to početak sedandeseteh let pasanega stoleća v Rukavce kade san ja vavek Novo leto z nonun čekal se dokla nisan počel vanka hodit z prijateli, no i z prijatelicami. Prej nego smo šli nona mi j’ više puti rekla da nebimo slučajno roštali na vrata kade još se štanjo zaprto aš judi još sigurno spe. Nekako smo već znali da kade su stareji judi i kade j videt da dimi z dimjaka da nas sigurno čekaju. Saka parona imela je parićanu škudelicu va koj je bilo munidi pak nan je podala kakov solad, a našlo se je i dosta bunboni. Ne domišjan se koliko smo teh soldi pobrali, ma to mi kot otroku ni ni bilo važno. Puno me j’ više veselilo to pohajanje po kućah. Pul Matuj se j ta užanca zatrla šezdeseteh let, ne znan kako se j ča to održalo va gornjeh krajeh, a morda se lepo još kade to i obiduje.
Jedan od najznačajnejeh simboli pobiranja „dobre ruki“ je jabuka kroz ku je provučena kita ružmarina. Va tu jabuku su se zabadali soldi. Čuda od vas se sigurno dobro spameti vreme vele inflacije kada munida ni vredila jušto niš tako,lepo da si i otel poć z jabukun pobirat „dobru ruku“ ne biš bil jušto niš dobil.
„Dobra ruka“ se danaska da soj dece od kada se rode pak dokla ne počnu sami služit soldi. Po kućah se već zdavni ne pobira. Danaska bi to bilo sramotno, a judi kot judi komać čekaju da se imaju čemu i kemu rugat. Kot da njihi nonoti nisu pobirali po kućah. Naša, matujska općina je pred par let počela z jednun jako lepun i za saku pohvalun užancun darovanja z soldi naši prvašići. Manje je važno koliko te njin soldi dat, a puno više da su to nazvali „dobra ruka“ kot spomen na našu staru užancu ka se pomalo zatire. Tako će i deca od judi ki nisu ovdeka rojeni baren neč našega zapoštat. Samo, malo mislin sam sobun, da ih ne bumo od mićega navadili da se na općinu hodi leh po soldi.
Ne znan ča bi današnja deca rekla da njin namesto soldi daš kakovu jabuku, oreh, al cikulatu. Hvala teško da bi, aš njin je puna rit sega. Ma solden se (još vavek) saki naveseli. Do kada će tako bit ne znan, ma mi se para da neće još čuda vremena deca prihajat starejen čestitat Novo leto i usput zet kuverticu. To će se se rešit z mobitelon, al kompjutern. None i nonotu te po Fejsbuke, al Skype čestitat, a oni te njin po netbenkinge uplatit „dobru ruku“. Tr, ki j već videl po kućah hodit čestitat!