Piše: Alfred Šaina

Cirka, otpriliki sakeh 10 let aktuelna tema seh ćakuli je energetska kriza. Energenti ne samo da poskupjuju leh nas i straše da ih neće bit, pak da će bit redukcije, pak da trebe šparat energiju i tako daje i daje, dokla to malo prepasa pak se na par let i pozabi. Spametin se kad san bil mići da je va matujskoj motoriziranoj maškaranoj parade bil jedan Fiat 850 i na njin breme prašća i natpis „energetska griža“. Kad san već mladićac bil kupil san prvi motor, to se zna APN, a jušto to leto pala je i energetska kriza pak su bili uvedeni boni za benzinu. Sto puti san prokjel drugaricu ka je za to bila kriva. Bila j’ grda kot sam vrah, obučena vavek va nekakov sivi kostimić, a to je bilo ženstveno otprilike kako kad se Benny Hill obuče va žensku. Bilo je i oneh ki su ju štimali… neki bivši „veli“ direktori ki se još vavek ne moru oprostit od vlasti.
I doma je pala odluka. Namesto na naftu, teplit ćemo se na dreva. Šumi, bogu hvala je, pak ćemo poć poseć desetak metar. Ja, ma nono pokojni je rekal da neka lugar bula dubje va šume aš ono ča je blizu cesti trebe čuvat, ako se ne daj boh, kakova bol dogodi pak da nismo vredni nosit. I, zmučili smo se kot tovari zinest to drevo do cesti. Par let tako, a onda smo videli da je lagje obrnut telefon, nazvat firmu i rascepana dreva ti pripejaju do kući. Leh spravit. I, platit, normalno. Već po najvećoj tepline dreva su spravna za celu zimu. Jedina briga je ako će zima bit oštra i duga da nan ih ne prifali.
Pametin se štorij od starejeh judi da su svojni sako toliko šli po breme al vozić drf v Lisinu. Bilo njin je za šetemanu, dve napred i onda jovo nanovo v Lisinu, al Lužinu, al kamo već. Da se razumemo, to su bila tanka dreva, više prašće nego dreva kakova danas rabimo.
Ma, kako je jušto bilo šli smo pitat na Žejane. Zač tamo? Zato aš su tamo judi živeli od seči dreva, a pogotovo od proizvodnje krbuna. Jedan od starejeh judi ki se živo spameti živjenja i dela va šume je barba Anton Doričić. Rojen je 1927. leta, a već 1933. z samo 6 let počel je pomoć ocu delat va šume. Prvo delo za otroka bilo je gonit voli, od domi va šumu i nazad.
Ovako j’ počel svoju štoriju barba Anton:
„To ni bilo kot danas. Talijanske vlasti su 1926. leta dale šumi na upravljanje. Lugar je bil neki Medvedić, s Klane. Seljaki su storili i šumski puti kako bi lagje prišli do šumi kade su sekli. To je duralo negde do početka drugega sveckega rata. Seklo se je grani od keh se j’ delal krbun i va to vreme skoro so selo je živelo od proizvodnje krbuna. More se reć da je to bila najvažneja privredna grana. Žejanci su krbun prodavali najviše svojen aventoron (kupcon) v Reku, a Munjci su svoj krbun prodavali va Trst. Krbun se je pakiral va vreće od 50 kil. Do štaciona va Šapjanah, al do Jurdanić se je to vozilo z vozi keh su vukli konji, al voli, pak z vlakon v Reku. Krbun se je prodaval va letnjen štajone pak ni bilo lahko po veloj tepline nosit vreću od 50 kil i na četrti kat. A hodili smo vavek na početke meseca kada su delavci va rečkeh fabrikah dobili plaću. Birat nisi mogal. To je bila jedina prilika za kakovu liru zaslužit. Va to vreme va sele su bile samo 3 ženske ke su sini zgubile va prven rate i jedan ki je bil žandar ki su imeli penziju. Mizernu, 10 lir, ma ipak su imeli nekakov stalan prihod. A mi drugi, koliko smo delali toliko smo zaslužili. Kad si platil porez si bil jako zadovoljan ako ti je malo ča više lir ostalo.“
A kako ste parićevali krbun?
„Ki je imel svoj posjed je delal va svojen, a ki ni je kupil pravo za seć va Lisine. Lugar, zvali smo ga „forestal“, je bulal drevo ko se more seć. Bilo je jako strogo, vele globi su bile ako si posekal drevo ko ni bilo bulano. Ako nisi imel za globu su ti zeli kravu, al zemju pak si bez niš ostal. Prokjeti režim je to bil. Zato se je pobrala saka kitica, pak su šumi bile lepče i čišće nego danas. Proti Šije su bile takove senokoši da si mogal ovce brojit z sela. Sada je se zarašćeno kot „bog nas očuvaj“. I cele familije su onda delale kad se je pripravjala kopa“.
Kada se je seklo?
„Drevo se je poseklo prej prvega aprila, odnosno prej nego je počelo zelenit, pak se je pustilo da se malo prosuši. Za to su bili dosta dva muški. Dobri težaki su užali poseć i parićat 10 „metar“ (kubneh) na dan. Jedna kopa dala je 10 do 15 kvintali krbuna . (tona do tona i pol) Tanjo se je raspililo na dugi od jedno 30 centimetar i to je bilo parićano za slagat va kopu, a debjo se je raskalalo. Za to smo imeli drveni bat i železne kajli. Ča je bilo predebelo za kopu zelo se je doma za ognjišće.“
A s čen ste pilili?
„Prej rata smo imeli jedne pili ke su šle na okruglo. Zvali smo ih „Kordunki“, aš su bile proizvedene va Karlovce, a potla su prišle „Amerikanki“. One su bile drite, imele su drugačji zubi i š njimi je delo šlo puno brže i lagje. Potla su prišle motorki i traktori…onda j već bilo lahko“.
Za teško delo ste se morali idobro hranit?
„Ja bimo bili da j’ bilo ča. Ma jedan prašćić od 150 kil na deset glav va familije je bil jušto niš. Bi ga bil jedan sam lahko pol pojil. Parićevala se je najviše palenta, a š njun kapuz, repa, al fažol. A ni vodi ni bilo. Va sele su bile samo četire šterni i to su ih storili judi ki su se vrnuli z Meriki. Ženske su sako jutro hodile z brentačami po vodu na izvori i kalići keh je bilo dosti aš nisu bile suši kako sada. Ma je trebalo hodit s tun brentačun. Onda su skuhale i prnesle tu hranu va šumu. I deca su nosili jist va šumu. Kad se je kopa važgala ni se šlo doma po 8 dan. Storila se je od drv jedna kućica i tu se je spalo.“
Su hodili judi i daje od kući delat?
„Su, i to dosti. I, ja san bil kako mlad delat va Ravnu Goru. Imel san tu delo kako butiger. Plaćica je bila 3500 dinari, a tamo san pileć zaslužil 25000 dinari za jedan mesec. Imeli smo, to se j zvalo „šlingerice“. Pilili smo va četiri i to nan je šlo tako dobro da nas ne bi ni današnja motorka mogla prestić. Pilili smo jelovinu.“
Danaska se krbun više ne dela, ni ni konji ni voli, a vozi ki su se očuvali stoje kako ukras po đardineh. Ma, barba Anton je sejdin zadovojan aš su njegov sin i vnuk nastavili parićevat drevo. Ni lahko, aš kasno pridu z dela, pojedu i brzo va šumu dokla je videt. Ovo leto su parićali već okol 200 metar. I bogu hvala, kupci je. Još i više nego se ariva parićat, govori barba Anton.
Normalno, kad mi si doma sedimo i lih dreva po telefone naručimo. Nono j’ užal reć da mu je seko drevo ko je va šparget hitil baren 8 puti pasalo kroz ruki. Kad ga je sekal, kalal, zinesal na voz, skrcal, raspili, rascepal, spravil i na kraje va šparget hitil.

Tekst prenesen iz Tramontane