Jas jur svojni pametin kako su uželi reć nekemu ki je pijan naznak padal da :“Ča si se napil jarboli?“, a kad smo već počeli okole hludit pak smo šli na Zvoneću, na Antonju stareji su rekli: „Pak se čuvajte jarboli napit“ , aš je to bilo kot da bi slabo i kiselo vino od kega si par dan bolan. I tako j’ naša brižna jarbolica ka je generacije othranila i kakov dinar va kuću prnesla prišla na slab glas. Z Istri su počeli boja vina i grozje za vino delat pripejevat, ukusi su nan se malo promenili, al pak smo se zobjestili. Intanto, jarbola se j’ još samo spominjala kot da bi jeno lošo vino ko se more još samo na Zvonećoj pit. Malo judi je znalo da to kiselo vino ko su na Zvonećoj pili je bilo se samo ne naša brižna jarbola. Sega je bilo zmešano nutar: najviše verdića, malvazije i tu i tamo malo jarboli. Verdić je potekal od talijanske sorti „verduzzo“ ka se sadi na područje okol Anconi, ale kako je tamo više sunca tako je i grozje slajo i vino bojo. Najveć su ga pnesli mladići i muži ki su služili talijansku vojsku,

a na Zvonećoj je bil jako štiman aš je bil vrlo rodan, grozdići su bili veliki i ni iskal neko velo bacilanje. Kako je va to vreme kvantiteta, al količina bila puno važneja nego kvaliteta verdić, a kašneje i malvazija su potisnuli staru autohtonu sortu jarbolu.

Od kako smo zašli va ovo našo treće tisućljeće nekako smo počeli više štimat ono ča je naše, cijenit i poštovat ono ča su nan stari zapoštali. Tako je jedna grupica mladeh Zvonećani 2003. leta pokrenula projekt da se jarbola kako autohtona sorta očuva i da se pokuša stvorit, kako bimo danas po modernu rekli, kvalitetna robna marka. Put ni bil ni malo lagak, ma entuzijazam i vela voja ku su imeli dala je rezultat. Jarbola je registrirana kako autohtona sorta va seh svetskeh vinskeh leksikoneh, a ovogodišnji urod je prvi ki je dal količinu vina ku će se moć širi auditorij provat, odnosno degustirat. Još se ne more reć jušto kada, aš pravo vino ima svoj put i ne gleda ni na sveci ni na blagdani.
Kako smo mi domaći judi jako rugjivi, a ni novitadi nan nisu baš vavek po voje tako ni naši zvonejski mladići nisu imeli jako velu podršku va svojen sele, još i danas se voli ki narugat da ta jarbola ni ona prava jarbola na ku su navajni. Ma za sreću, nisu puno porajtali ča judi govore, a i dobili su vrlo važnu podršku va Općine Matulji. Sad već bivši načelnik Bruno Frlan Matiškov puno je storil da se potakne uzgoj i razvoj jarboli kako autohtone sorti na područje „Zvonejskeh njiv“ ke su i zaštićene kot spomenik kulturi. Trebe spomenut da je prvi općinski načelnik Radivoj Marmilić od samega početka prihvatil ovi naš projekt, a i sadašnji načelnik Mario Ćiković nas podržava. Nakon čuda let propadanja i stagniranja konačno su se stare zapušćene lehi počele pomalo obnavjat i parićevat za sadnju jarboli.
Znan da van već slini cede, da ste kurijoži i da komać čekate pravu jarbolu provat. Ja san bil te sreći da san dobil za pokusit žmuj lanjske jarboli, ka se čuva kot krv Isusova, a za to iman zahvalit Alenu Kinkele – Kosmačevemu, Ervinu Staniću – Tonarovemu i Frankotu Ružiću – Agnijinemu ki su na čele Udrugi „Jarbola“ ka će uskoro bit i službeno registrirana kot udruga i ka će kada stekne pravnu osobnost bit ta preko ke će se poticat uzgoj i proizvodnja jarboli. Stran udrugi, vrlo je važno reć da je Franko Ružić i svoje zanimanje posvetil vinarstvu i vinogradarstvu. Finil je poljoprivredni fakultet va Poreče i stekal titulu „inženjer vinogradarstva i vinarstva“. Stipendirala ga je naša općina tako da će se „projekt jarbola“ ravijat pod stručnen vodstvon mladega Zvonećana, a ki je okol sebe okupil dosta mladeh judi ki su na pravi način pokazali kako se drži do starini i kako se konkretno more pomoć razvoju svojga kraja i imidžu općini.
Ćakulu od jarboli počeli smo, a kade drugde leh va konobe. Stara zvoltana konoba, a va njoj par bocuni va keh „po starinsku“ vre del ovogodišnjega mešanega uroda, a na drugi kraj dve ogromne bačvi od inoxa pune tubi, uric i z aparaton ki održava potrebnu temperaturu. Gušta je ćakulat kada judi znaju ča delaju, zač delaju i ča te delat.
Fanko: „Tu je ovogodišnji urod jarboli i sad dura postupak hladne fermentacije. Teško je reć koliko će litra vina na kraje ispast, ali sigurno će bit količina ka će se moć dat na degustaciju juden, a del će poć i va komercijalnu upotrebu.“

Kako je to od starini bilo z jarbolun?

Ervin: Zvoneća je imela okol 60 hektari poljoprivredneh površin od keh su dobar del bili baš vinogradi. Vino je bil jedan od važnejeh izvori prihoda većine familijan. Vino se je prodavalo neč privatno, neč oštaron. Ja se spametin da smo mi, kad san još otrok bil, prodavali vino jednemu oštaru na Gromišćinu.
Alen: Nona mi je uževala povedat kako su kad su hodili va košnju sobun nosili vino i rakiju na Mune i Žejane za prodat. I v Opatiju i v Reku se j’ nosilo za prodaju.
Ervin: Proizvodilo se je fanj vina, va konobah su bile bačvi od par sto litra. To su naši nonoti delali. Već naši oci su bili „industrijska generacija“ ka je počela zapušćevat vinogradi. Ne ča su oteli, nego nisu arivali uz delo još se bavit z vinogradarstvon. Neki su uspjeli neč očuvat, više za svoje potrebi, ali nisu šli napred ni z uzgojen, ni s tehnikun. Ostali su na livele kako su nonoti delali. Rekli su: „Tako su nonići delali, tako ćemo i mi“. I dan danas se neki tega drže.

A kako su to njihi nonići delali?

Franko:
Pobereš, zmastiš,hitiš va čabar, va noveje vreme su dodali malo cukara. Prej nisu aš cukara ni ni bilo toliko. Va sred bačvi se je stavil oplevalni koš. Z nogami se j’ mastilo grozje, mošt je tekal va ta koš ki je proti dnu bil na špic storen, od kuda ga se j z palčićen pobiralo i levalo va bačvu. Onda su prišle makini za mlet.
Alen: Najprej su bile drvene, to su malo boji majstori doma sami storili, a potla od pleha. Danaska već nijedan nima drvenu makinu za mlet., a ja san još kot otrok š njun mlel. Imela je morda 3000 čavli.
Ervin: I tako j’ krenula era makin. Mlelo se je, pak se je vino držalo pod dropun čak i do 15 dan. Neki stari judi i danas drže desetak dan, ale kako je vreme pasevalo tako se je i vino se kraće držalo pod dropun. Današnje vreme drže okol pet do sedan dan i onda se pretoči va bačvi, pak se opet za „Martinju“ pretoči.
Alen: Užalo se je dogodit da su vino popili još dokla je pod dropun bilo, ha, ha.

Kako se je jarbola kot sorta zatrla?


Franko:
Judi su počeli jarbolu zapušćat aš je ona kot sorta delikata, puno je dela okol nje, a prinosi nisu ki zna ča.

Kad j’ krenula inicjativa da se jarbola obnovi?


Ervin:
Mi smo to pokrenuli 2003. leta. Općina je dala sredstva i prišli su z Poreča z instituta. Franko i ja smo šli do starejeh judi ki su nan mogli sigurno reć i pokazat ki su trsi od jarboli. I našli smo ih jedno dvajsetak. S početka su nan se smeli i ruga je bilo. „Nimate vi pojma“ su nan govorili. Mi smo šli samo z idejun da vidimo ka je to sorta. Nismo ni sanjali da će se utvrdit da je to autohtona sorta. Misleli smo da je to rebula, aš je ime slično. Uzorki 20 trsi su zeli va Poreč na promatranje. Utvrdili su da je od 20 ruž samo 5 virusno zdravo i spremno za uzgoj matičnega nasada. Drugo leto su od uroda teh 20 ruž storili vino, pak su delali kemijske analizi itd. i utvrđevali da li vino ima potencijala, kakove su mu kiselini, aromi i se stručno ča mora bit. Sledećeh leto dan su z metodun premeranji prema DNK analize utvrđivali sortu. Najprej va svojoj baze, onda su šli daje va Italiju, pa va Francusku i na kraje va Kaliforniju ka ima bazu podatki seh sorti ovega sveta. Onda su Merikani objavili, odnosno potvrdili da je jarbola autohtona sorta. Zad ten je institut provel postupak za registraciju i to je objavljeno va Narodneh novinah. Tako je sad sorta jarbola i vino jarbola zaštićeno kako ime, a zaštićeno je i da se more sadit samo va našoj zone. Institut je utvrdil da vino ima potencijal i da se uz pravilan uzgoj more proizvest kvalitetno vino.

Ča to znači pravilan uzgoj?


Franko:
To znači, va prven rede da se mora kontrolirat prinos, odnosno po jednen trse ne sme bit više od kila i pol grozja i normalno smiron okol ruže bit: rezat, škropit, gnojit…
Moru sad i drugi judi ki su zainteresirani posadit jarbolu prit do trsi za sadnju?
Franko: Moru, samo još ne znamo koliko će trsi bit, aš uzgoj sadnic va matičnen nasade gre postepeno i to na dve lokacije, aš da slučajno kakova bol na jednoj lokacije, druga će se očuvat.

Su judi zainteresirani za sadit jarbolu?


Ervin:
Pa i ne baš jako. Sad ćemo storit sastanak, videt ki i koliko je zainteresiran za sadit pak će se za drugo leto naručit toliko sadnic. Problem je da su prezidi jako zapušćeni, treba ostrugu očistit, koreni zikopat, zemju pripravit. Još smo dugo od sadnji. Ali moren reć da se je zadnjeh let posadilo cirka 3000 trsi.
Koliko će bit ovo leto litar jarboli?
Franko: Okol 600 litar

I ča s ten?

Franko:
Popit, ha,ha. Ma del će bit ponujen na prezentacije ku će naša udruga organizirat, del će poć va botilje, pa va prodaju. Pasat će se, bez brigi.

Kakova je tržišna perspektiva?


Franko:
Jarbola je perspektivna va toliko ča je to autohtona sorta i jedinstvena.

S kemi jedi će se moć jarbola kombinirat, s čen paše?


Franko:
Jarbola spada va lagana aromatična vina sa naglašenim kiselinama, a ona se najboje slažu z slanen i z kiselen. Znači, z malo težun hranun kot ča je naša domaća hrana, kiseli kapuz, al repa s kombasicami, s prašćevinun, slanemi ribami
Ši to znači da će se jarbola jako dobro uklopit va projekt „Cesta domaće hrani“?
Franko: Kako da ne. To će bit idealna kombinacija, samo kad budemo imeli pravu količinu za ponutit i normalno da cijena va ugostiteljskeh objekteh bude realna rangu i kvalitete jarboli, a to je recimo rang kvalitetne malvazije.

Je još ki zainteresiran za proizvodnju jarboli?


Franko:
Va dve besedi ću ti reć: strašno skupo. Investicije va bačvi i opremu za hladno kontrolirano vrenje su ogromne, a količini grozja su ipak ograničene i trebalo bi fanj let za to splatit.
Alen: Ne znan koliko bi se to splatilo da je više proizvođači, da ih je 3,4 pak da saki dela malo. Mi mislimo da je boje da to se dela jedan. Judi neka imaju vinogradi i grozje, ali za rentabilnu proizvodnju je dosta jedan.
Franko: Da se razumemo, ova moja konoba nima ni približni uvjeti za ozbiljneju proizvodnju, ali va plane je neč dogradit i storit pravi podrum. Teško je ovako bavit se s ten i delat va firme.

Opiši nan va par besed kako ti sada proizvodiš vino….

Franko:
Ma ni to niš novega. Ja tako delan već pet let. To je takozvana kontrolirana fermentacija. Vino sada vre na 17 stupnji. Plus tega držiš tako da pomalo vre i zaprto je tako da va vine ostaju se aromi. A postupak je sledeći: grozje se najprej zmelje, odvoji od, mi bimo rekli, košćini. Sprešaš da ziteče samo mošt ki se stavi va ove vele bačvi. Mošt se hladi na 10-11 stupnji i taloži, tako da talog pade na dno. Nakon 48 ur se talog očisti, vino pretoči i zdigne se malo temperatura na 14-15. Dodava se hrana i selekcionirani vinski kvasac. I onda tek drugi dan počne fermentacija. Sledećeh 5-6 dan mošt vre. To je burna fermentacija, nakon ke počne period tihe fermentacije ki dura od 20 do mesec dan. To ovisi od cukara.

Kako znaš kad ga pretočit?


Franko:
Kad fini fermentacija vino se opet počne taložit. Najboje ga je čin prej pretočit, a ne pustit da s taloga pobere sumporovodik. Najboje je zmerit neprovreli šećer i po ten se najboje zna kada fini alkoholna fermentacija.

Užaš juden dat kakov savjet?


Franko:
Judi znaju da san ja to neč finil pak mi reču da su storili tako i tako aš da su to negder pročitali. Ma najveć puti pročitaju polovično, al krivo pak se ja jadin da neka čitaju kot je trebe, al neka ni ne čitaju.

Vjerovatno će i osnivanje vaše udrugi pridonest kvalitetnemu razvoju vinogradarstva i vinarstva na Zvonećoj…

Ervin:
To će sigurno, baren pul oneh ki budu voljni poslušat savjet stručneh judi, magari, za istinu povedet, pul nas to gre malo teže. Moran još povedet da je osim nas trih još nekoliko judi aktivno uključeno na osnivanje udrugi. To su Gordan Kinkela – Mihojev, Goran Šepić – Mihotinić, Đani Sušanj – Barbov i Marin Ružić – Agnijin.

Bilo je već trdo škuro kada san šal doma, ni me nijedan videl, ma van moren garantirat da me ni naznak vuklo. Sam sobun san mislel kako bin volel da umen opisat ukus neše jarboli. Ono kot reče jena kolumnistica va novinah: majugi na zajike, bademi na nepce, citrusi va grle, pokošeno sijeno u nosu i još čuda besed va jednen gute. I cela povijest jednega sela pretočena va žmuj jarboli ku su ovi vredni mladi judi spasali da se ne zatare. Ma ča spasili, još su je i podignuli va rang kvalitetneh hrvackeh vini i tako se na najboji način odužili svojen nonićen za trud, muku i pot ki su proleli na zvonejskeh njivah.

Tekst prenesen iz Tramontane