Sedin va kuhinje gledan kroz poneštru, već san pojila 5-6 grašnjaki, a moran poć pul duktora da mi zmeri cukar, a ja… pa će zijat „gospa Ivanka, opet van je cukar previsok, ste pazili ča jiste!?“

„Ma ja, …sad je štajon od maruni, ki će mislet na cukar.“
Pa si mislin, ću van napisat dve besedi :
„Ši znate da je va Lovranšćine Marunada?……Judi moji čaj tamo sega dobrega za pojist!
San se zalaufala…. prvo ću van povedet kako j se to počelo: /kako su mi judi povedeli/
….. pred više od 300 let naši mladići su šli navigat, pa su z kraja sveta (Japan) prnesli nekakovo drvo i cepili ga z diven marunon. Takovo drevo je današnji marun ki raste va najlepšen kraje sveta, zdola Učki, a najviše zgora Lovrana, Dobreća itd. To drevo se raširilo i se je bilo puno voćnjaki od maruni. Onda su Talijani (kako to samo oni znaju) nanjušili da bi imamo neš dobro za pojist, pa smo već pred 100 let imeli „export“ maruna va Italiju i va Austriju.

E … onda je se fermalo. Kako i se pul nas : se čaj dobro ćemo zatrt, a onda jako brontulat. Ma dobro ala.. homo daje aš su se judi „zbudili“ i opet spametili da nan neš dobrega raste „zgora nosa“. I tako je počela Marunada va Lovrane, Dobreće, Lignju itd. .. znaju judi kade.
Pa danaska morete prit va Lovran, pojist kakovu slašćicu od maruna, al pak pečet marun , zalet ga z malo vina, oni hrabreji moru popit i kakovu rakijicu, naslišat dobru muziku ……………….Ma prej sega videt naše užanci.
A lovranske črešnji ………. ma to ću van povedet drugi put
Mi je vnuka pročitala na internet da je Marunata finila mej 10 gastro festivali prema jeneh novinah va Britanije (Guardian).
Tako , se van to dura dve šetemani (skoro je već i finilo) , pa nemojte reć da ni vremena, magar malo prošećat lungo mare, se fermat malo pogledat…
Tu san van stavila i dva recepta pa si doma morete neš storit.
Ja, još neš….. nemojte poć juden krast marun va šumu, aš bi vas mogla kakova palica po glave
ovo je naš domaći kolač od maruni i ja ga jako volin, recept mi je dala Branka z Bregi,i rekla da ni komplicirano.. tr znan i ja. Ma je lepše kad van neki prnese:

Grašnjaki
1.Sve skupa zmešat i storit boću: ½ kg brašna
25 dek margarina
1 kiselo vrhnje
3 žlice cukara
1 pecilni, 1 žutnjak i malo soli
2. Fila : 1 kg maruna (skuhat i zmiksat)
dodat malo teplega mleka, cimeta, rakije ili ruma
15 dek putra, 1 žutnjak i cukara koliko ki voli
Testo razvaljajte na tanko (4 mm) i z okruglun modulicun ili žmujon izrezat krugi. Saki krug i njego rub namažite z belanjkon (to van je kot lepilo), a va sredinu stavite filu, preklopit i dobro stisnut rubi da fila ne pobegne vanka. Peć va duboken ulje.
Kad se grašnjaki malo ohlade posipajte zgora malo cukara va prahe

Rolada od maruna
1 kg maruna ( skuhat, očistit i zmlet)
20 dek putra
20 dek cukara va prahe
4 žlice ruma
½ litri šlaga
za glazuru: 20 dek črne čokoladi
5 dek putra
i malo mleka – po želje
Cukar i putar penasto zmutit i dodat malo ruma pa se to zmiksat z maruni. Kad je smjesa gusta razmažite ju na masnu kartu prst debelo. Stuć šlag i namazat preko maruni. Držite za kartu i zarolajte.
Stavite va frižider da se stisne.
Storite glazuru i prelejte ju preko roladi od maruni. Pustite da se se još malo ohladi va frižidere i servirajte.