Piše: Alfred Šaina

Skoro saka beseda ima svoju asocijaciju, ča će reć da nas na neč domisli, spameti, podsjeti, al ča već. Na ča vas spameti „konoba“? Tako uobičajena, sakidajnja beseda. Ča ona znači i od kuda va našen zajike bi van sigurno lepo znal povedet moj prijatel Jani Kukurin, pak jas neću od tega. Leh znan da ni „talijanizam“, aš Talijani reču cantina, ni germanizam, aš Nemci reču keller, morda su nan ju pustili Napulijonovi soldati, kot i čuda tega, a morda je baš naša hrvacka. Čigova je da je, homo mi videt ča se zad te besedi skriva.
Kad san bil mići moj nono je imel konobu. On ju je zval, nikad ne znan zač, kanoba. Va jednen dele konobi bile su bačvi za vino, ko se je tuka i delalo. Kad se j’ vino otočilo i pretočilo obesilo se je kumbasice, panceta, zarebrnik i pršuti. Ki put i salamini. Malo daje od vina bili su čabrići z kiselun repun i kiselen kapuzon, do njih pak slane ribi va drvenoj burice, a kompir je bil ograjen kot da bi z gredami i daskami. Najdaje od bačav bila je jedna grda, siva bačvica od jeno trejset litra va koj je bil ocat. Va njoj je plaval „telac“ ča je mane bilo jako smešno pak san vavek špijal da vidin tega telca, ki ni bil ni malo spodoban sinu od kravi. Više je bil kot jedna štracina. Na petoniranen kantere stal je stakleni bocun z rakijun, do njega par boc z rakijun va koj su bile travi, pak va nekeh višnje, a va škureh bocah je bil orehovac, rakija z orehi ku je nona fanj vremena po lete držala na sunce. Vreme mojga djetinjstva sindikalne zimnice su bile na vrhunce popularnosti, pak su va konobu arivale i staklenki z kiselemi kumari, paprikami, ajvaron, feferoni, kapulicami i ča ja znan česa se ni bilo va teh škatulah. Naša mat se ni dan danas navadila da se to moreš saku dobu i sagdere kupit pak ima vavek magacin hrani spravan. Usput, bil san vreme (ovistega) rata va jednoj konobe kade san videl toliko hrani da, me par, još dan danas to jedu. No, tel san lih povedet da je konoba imela svoj „prehrambeni“ del, pak viš kamo san finil. Inšoma, bilo je va konobe još i kapuli, fažola, česan je bil va kosicu opleten, ma sake gracije božje. Ča si više hrani imel spravno to si bil boji i štimaneji hmet. To se zna, konoba je imela i miću poneštricu kroz ku je pomalo puhjetal frižak zrak. Ta je poneštrica bila zagrajena z mrežicun da ne bi kakovo blago zašlo nutar, a okol poneštri su pauki svoju mrežicu storili. Nono ni nikad pustil tu paučinu čistit, aš ona da čuva konobu od muh i komari. Danas bi van se narugali da van je konoba blatna, puna paučini. Pače ja, va srede konobi je bila jedna škuja na koj je bila železna rešetkica. Vetrnica. Tamo se je zlevalo se ča je po bačvah i bocah ostalo, al kad su se bukaleta al pak kakov žmuj oprali.
Drugi del konobi je bil više onako, za spravit orudje i drugo ča rabi za delo po vrteh i okol kući. Grabje drvene, grabje železne, matiki, caponi, sekiri, kosa, stali su va jednen kantune vavek čisti i parićani za delat. Bil je tu i na drvenen škanje brus na ken je nono brusil kosi, sekiri, škare, noži. Ma, se ča mora bit oštro, stran ženskega zajika. Bilo je tu i drugega orudja: tišjarskega, zidarskega, mehaničarskega i ki bi to već danas znal ča se ne. Teta nevoja natirala je naši stari da se navade sakakovemu delu, aš ni bilo beči za plaćat majstori za saku stvar ku je trebalo storit, ale pak popravit.
Dobar del konobi bil je založen z nekemi stvarami „ke je škoda hitit ća“. I poboga, z današnje perspektivi zaspraven je bilo škoda hitit neke stvari ća: stara orudja, pošadi, pokvareni radio, uru ka već ne hodi, stari koš i mići košić i još čuda lepeh stvari keh smo počeli štimat sada kada ih već skoro ni. Ma, ni se za čudit ča su naši nonoti takove stvari čuvali magari su zgubile svoju „uporabnu“ vrednost. Najveć puti su do njih s teškun mukun prišli, al su pak nasledili od svojeh stareh ki su njin to pustili kot svoje najveće bogatstvo.
Prišle su nove generacije, generacije masovne potrošnje i blagostanja za keh takove stvari nisu imele dušu. Al ju nisu oćutili. Niš jih ni vezalo za njih pak su to se bez problema pejali va Osojnicu. Ki nisu bili tako „napredni“ da se staro ća hite danaska se štimaju i po konobah ponosno obešaju na zid, ale pak kladu na kakovu stalažu. Provajte ki put zet v ruki kakov stari koser pak ga pustite da van poveda: kako j’ bižnona š njin požela okol kamika kamo kosa ne more dokla su kosci jili drugu rušnju ku njin je ona va koše z plašćanicami prnesla. A keh žuji je storil na rukah spucaneh od škuj va ku si mogal smolu levat. Koliko puti su ga nakjepali, koliko radića je požel za lačna usta nahranit. Provajte ga poslušat i čuvajte ga od brša i ruzini.
Pravo za pravo reć, konobi nisu tu i s nami odvavek. Ki got van reče da ima konobu preko dvesto let staru teško da govori istinu. Prostor je morda dvesto let star, ma konoba va današnjen smisle te besede tu sigurno ni bila. Govorimo od konobi kako skladišta za hranu i spremišta za orudje.
Nekadajne kući, ale boje za reć nastambi, bile su prizemnice va keh su pod isten krovon bivali judi i blago, a ono ča su naši stari hranili va svoje konobi bilo je va isten prostore va ken se je spalo, jilo i živelo. Konobi kot konobi judi su počeli imet kad su počeli delat kući na pod, al kako bimo danas rekli na kat. Konoba je obavezno bila zdola, a prostor za bivat bil je zgora. Va to vreme odelil se je prostor za blago (dvor – za rogato blago, kotac za prasci i kokošilnjak za kokoše) va ken, al zgora kega je bilo i spremište za seno i slamu od prostora va ken su judi. Ulaz va konobu bil je, va pravile, zvoltan ča će reć da se je va konobu šlo z pod voltu. Neki put je ta volta bila veća, neki put manja. Ako j’ bila veća, onput je ta prostor služil za delat razna dela ka su se mogla delat kad ni jako zima (košići plest, brusit, ča popravit, sekiri nasadit) aš je bilo zaštićeno od dažja i sunca. To bi se danas zvalo veranda. Nisu si ulazi va konobu bili z s pod pergula, ma su vavek bili storeni na voltu, al pak z kamenemi ertami na keh je pisalo kega leta su storene i inicijali parona ki jih je storil.
Mislin da je to dosti od nekadajneh konob.
A današnje…. Danaska postoje dve sorti konob: konobi kot ugostiteljski objekti, ale pak oštarije i konobi keh su storile al jš boje sačuvale neke mlaje generacije.
Od oneh prveh me, za iskreno, ni jako voja pisat, zač mane asociraju na restorani va keh neki nasadi kakove grabji, dva košića, kakov zvonac i tu prodava pod navodniki, doslovno, domaći pršut po petsto-šesto kun i opet pod navodniki domaće vino po sedandeset kun, a namesto obrusa stavi na drveni stol tavaju i salveti od harti. Va nekeh te ne puste ni zasost ni zakantat.
A, one druge. E, to je već neč lepega. Za pravo reć je i tu sega. Je lepeh, je grdeh, je starinskeh, je moderneh, je kičasteh. Već proti gospodaru, ma glavno da ih je.
Moderna vremena prnesla su svojo. Kad bimo, stavimo reć, zibirali najlepču konobu va našoj općine bi bilo jako teško. Zač pak teško? Zato aš postoji više vrst konob.
Jena sorta konob su stare konobi ke su zadržale svoju starinsku funkciju od ke san prej pisal. Jako ih je malo ostalo, ma još ih je, Bogu hvala. Va njih je još malo diha po mufe, po kiselen kapuze i mese ko se suši zgora bačav. Maraju bit malo pod zemjun da temperatura bude ni previsoka, ni preniska. Zvoltani podi i drvene bačvi, križ z Isuson i slika od druga Titota stoje jedan do drugega, a spod njimi Spomenica Domovinskega rata. Bil san i va konobe kade još i slika od Dučeta visi. Si oni vise, samo mi još stojimo pozgorun. Va teh konobah se ne more pušit, a paron će van dat pit z bukaleti na stojeć. Pokazat će van škatuli za puhi, a ako počne štorija od zvončari nećete brzo vanka.
Druga sorta konob su moderne konobi. Teško je reć i opisat prototip moderne konobi. Uglavnon, more se reć da su te konobi danaska postale prostor za opušćeno druženje z prijateli. Ki put su kombinirane z starinskemi konobami, ki put je kraj njih vinska konoba, ki put imaju i kamin, al ognjišće, ki put su lepče leh dnevni boravak. Zmućena vremena su nan prnesla potrebu da imamo mesto va kuće va ken ćemo moć pit z bukaleti, jist z prsti, zakantat ako umemo, ako ne, ćemo kračet, kade moremo s prsti va nos badat i kade nan niki neće niš zamerit, aš smo malo popili….. pak smo rekli ono ča trezni mislimo.
Ste se kad pitali zač va takov prostor otejemo narivat čin više „starini“, se ča j’ od nonoti ostalo, ča smo na šufite našli, a još bimo i kupili od kega ča starega (obično ne gjedamo koliko košta). Radi estetiki? Morda malo…. Ma više radi tega ča nas te stare stvari (podsvjeno) vrnu va vremena našeh pretki ki su teško živeli, ma bez stresa i puno veseleje.

Tekst prenesen iz Tramontane