piše: Nina Dukić Srok

Bit zvončar ne znači oprtit zvonac i kanpanat. Bit zvončar znači pokazat kemu pripadaš, čigov si i kade ti je mesto. Reć sakemu da si svoj na svojen, da trdo stojiš na svojen kamike i z raširenemi rukami z mačukun v ruke poručuješ: “Volin i čuvan svoj kraj!”
I sako leto odvavek i zavavek obahajaju zvončari svoja sela. Z sakega od njih – neki je zvončar. Oživeju, magari na kratko, stare šterni i zapušćeni putići. Tresu se skodi i volti od veselega koraka potresujki. Va saken jih sele judi radi dočekaju. Parićaju ča ki more i ume, ma nastoje da se užanca ne zatare, aš kako judi reču: “Da mu vrah zel krijancu ki pozabi staru užancu!” A naša se užanca neće i ne sme zatrt !
Oćutila san to i ovo leto, aš san kanpanala, kumpanjala jih si tri dni. Već san čuda puti rekla da ako mi je zavin čega žal ča san ženska, onput je to zavin tega ča ne moren bit zvončar. Sreća da je užanca hodit za zvončari. Poć vavek naprvo i daje! Zato mi valda nijedan ne zameri ča za njimi odvavek kraman po celi dnevi.
Pusna je nedeja. Spaćena san aš san celu noć va Dome prolunpala. Ma ni lazno spat! Već se rano i va kuće šušuralo. I z naše kuće gredu dva zvončara. Otac i brat.
Nedeja, 7 i pol jutro. Put nas peja h Marčejan. Pul Bačurkineh otprta vrata nekadašnje oštarije. Tu j’ okupljalište. Gjedan jih. Zima j’ za ponemet. Oni va kratkeh rukaveh! Hitaju na se vele ofčje koži, namešćuju zvonac. Korak – dva, za provu ako dobro zvoni. Stišću špagi junačka pleća. Mišićave, grebujave, jake ruki mačuku drže. Strašne maškari glavu pokrivaju. Smeju se krepki halubajski muži, porivuju, zijaju, nazdravjaju. Neki su oci i svoji mići pripejali. Vežuju jih, parićuju, davaju uputi kako se moraju ponašat i ča delat. Za zvončara se vadi od mićeh nog. Na njih svet stoji!
Najedanputa je fičić zafikal. Eeeeeee! Čul se j’ glas z čuda grl. Zatulili su rogi, zasopla j’ armunika, truba i bubanj. Krenuli su! Greduuuu!!!
Na početke bandera. Trdega koraka i krepke ruki zvončarina maše š njun, štiman i zadovojan aš nosi svoj i naš ponos va svojeh rukah. Za njin kapo mićeh zvončari , pak zvončarići. Zovu jih mići, magari va njih kuca velo zvončarsko srce. Kapo od veleh, pak onda ONI! Ponos našega kraja. 150 zvončari! San sa nasrhnjena. Zvoni, zvoni, rompota, kjepeće… Zad celun kolonun tače se medo.. Pun je voji za kumedijat. Komać čeka ženske strašit i lovit. Pejaju ga dva črni. Grdi, rasparani, očrnjeni. Z broskvun ka visi z starega rucaka. Se po užance. Sobun vuču Pusta. Pohićuju ga, vritnjaču i delaju nemotarije. Neka trpi, aš je kriv za se ča se j’ nekemu slabo dogodilo. A viš ga, na! Zvončići kanpanaju, aš nekako na pošep teče! Črni se kot sam vrah! A tr je pravi vrah i se j’ vražjo va njin!! Kuliko će obrazi obušat oveh dan!
Nedejni dan kunpanija gre od Bačurkineh do Brentarića, pak va Marčejsko selo. Va njin su najštimaneji Marčejci, aš to je njih kamik. Od Marčeji pomalo se prtimo h Garićen, pak Klićen. Čujen kako zvončari hvale presnac. Od Klić gremo Globićen, pak Zorzićen, pak preko Krasi Lučićen. Gušta se prava domaća hrana. Kopir na lešo i režnji. Ma će žarit! Va saken sele muzika sope. Tanca se i veseli. Red je da zvončari zatancaju z ženskemi z sela i tako poštimaju selo i njih trud kega su uložile parićujuć zvončaron. Prilika je to da se poćakula z judi keh se ne vija saki dan. A to je najlepče i najvredneje. Od Lučić se pomalo spušćamo h Saršonon, pak zdolun va Zavučinu, oko Jankova i zgorun va Tončevac va Biškupovo selo. Po uskoj cestice, mej gromačami kot kaška, hodila je zvončarska kolona. Mahali su njoj borići z Plešivca, jujali se va ritme zvonci. Od Biškup daje Brtunon, preko Koši h Mladenićen, pak po zada Trtnon. Mojen Trtnon. Va mićo selo kega skoro da već i ni. Va njin moja nona peče najboje orehnjači , supice, puhanci… i dok je noni – zvončari će vavek čekat pun stol sega i sačesa. Pul Trtan je bila štacija kade se j’ šilo puci, aš su već trbuhi narasli, pak su popušćevale dušice. Od Trtan se po Pojane gre Jurašon, pak daje Blažićen. A tamo je bila prava fešta. Udružil se Mladenićev orkestar i zvončarska muzika. Al se zviždalo! Kakov gušt! Ma smo tancali se po onen kamenen i pešćeven! Od Blažić se gre Petrcon pa po strmoj stazice zdolun Tibjašon i v Škurinju. Tamo su čekale kurijeri za na Korzo. A Korzo vre kot kotal.! Soplo se, zijalo, kumedijalo. A kad su Halubajci prišli, karneval je doživel vrhunac! Skakalo se va fontanu, bedačilo i kumedijalo. Judi su jih pozdravjali i veselili se. Na glavnoj pozornice meštar Toni, krajica i Obi su čekali da pridu jušto Halubajci .Š njimi fini najlepči, najveći i najnemeji Rečki karneval. Ja, karneval je finil. Finili su i zvončari prvi dan obahajanja. Prišli su doma blatni, trudni, z velemi žuji, ma zadovojni. Dočekala nas je mat z teplun juhun i z parićanun monturun za drugi dan.
Pundejak je zlevalo kot z kabla. Ava mane! Ni za s kući zić. Mat njurga da nijedan normalan ne bi šal na ovu umidancu pohajat. Odmašila je ke ćemo se boli na se navuć, kako ona neće za nijenega po duhtoreh pohajat, kako smo bez pameti! I kakova j to prokjeta voja i trdoglavost… Mašila je, mašila, ma nas je sejedin Bačurkinen pejala! Daž je pada kot da je pogodil! Zvončari veseli! Niki ni od čera pomolal! Si su na broje! Opet gredu! Vavek naprvo! Danaska je dan obahajanja Kuta i kastafske strani. Krenulo se na 8 od Bačurkineh preko Vrtač, zdolun po šume h Koson. Kosi su pravo selo ko zajedin jutro dobro nahrani zvončari z domaćemi konbasicami i teplen čajon.
Natapja se ofčja koža , teške maškari postale su još teže. Ma se je daje šlo h Jardason, pak Brnčićen, na Rudno, na Krajevac , pak Jelušićen , Jelovičanon Opuzlo je, pak je sako tuliko neki pal. A lahko past z sun onun monturun, a najteže je stat. Se su jedan drugega potezali, pa se j’ zaključilo da će za k letu saki morat imet zimske gumi, a ne zlizani postoli. Od Jelovičan se gre Gornjen i Donjen Turkon, pak prek dragega Ćikova Žegoton. Od Žegota preko Pavletić va najlepči grad na svete – naš Kastav. Čeka sako leto ta gradina na brege, da mu pridu zvončari. Onako star, z bršjanon obrastal i z olupjenemi gromačami opre sa svoja vrata i širokega srca primi sakega gosta, a posebno zvončari. I teško i pomalo prtili su se na Forticu se do Kastafskega trga, kade je složno ozvanjalo zvončarsko zvono, kastafska sloga i čulo se j’ va zrake: “Si smo ga…!” Da se ne pozabi! Z Kastva se spušćamo Jurčićen. A Jurčići su pravo pusno selo. Pričeka nas maškarana kunpanija. Na pozornice- gromače- sope pusna muzika. Neki nono pohaja z barilcun Jurčićeve belice. Si Jurčići su vane. Tanca se na plesnen podije jene garaži. Jurčići, pravi ste! Od Jurčić gremo na Šporovu Jamu, pa Banon. Daje po šume, dolceh i ravnah Ćikova. Al se padalo, drsalo i munjesalo! Preko Pojani zišli smo Kudejon, Frerencon, pozada daje Srokon . Pasujemo po Srokoven sele zgorun, pak dole na nekadašnji Srokov Kal kega već nažalost ni. . Daje nas put peja h Dovičićen. Va selo mojga oca. Pul Dovičić se na šterne tanca, a nono i selski muški vavek kantaju po starinski. Lepo jijh je čut i drago mi je aš retko to već vidimo. Od Dovičić popreko spod Halubjana prihajamo Brnason. Arivala san va Sovićevu konobu i uživala va dihe bačav i kiselega kapuza. Već nas je i noć ćapala, je i zima, pak se nekako žvelteje gremo prema Širolan, pa na Vožišće, i va Sveti Matej na Breg. Forca ni molala. Još je glasa, moći i voji. Krepko kolo pul štandara za finiš pusnega pundejka. I gremo počinut, steplit se, aš jutra trebe opet poć!
Utorak je. Zima j’ jušto kako rabi. Danaska se gre na Smokvariju i Zamet. Tura je malo kraća, pak ćemo lagje. Fičić je čut! Kreće se od Bačurki . Put nas peja Mavron, Marovičinemu pak h Gornjen Srokon .Tačemo se Vajanon, pa po zada vanka na Vožišće. Pred školun nas čeka čuda školani. Si su maškarani. I njin je danaska blagdan. Lepo je da i škola štima naši običaji. Kroz Sveti Matej hodimo na Furićevo i daje do Marinić. Od Marinić se gre Šrefanon , Pletencon. pak zdolun na Pehin. Na nekoliko se mesti ni zvonilo. Nažalost! Spametili su se zvončari drageh prijatelji ki nisu već š njimi, magari va njigoveh srceh zavavek! Z Pehina gremo Hoston. Po toj ceste je vavek metež aš je usko, pa je šušur i rivanje. Daje gremo poštimat Zamećani tamo do Drnjević. Onput se vrnjamo pomalo zgorun. Gremo Tićen, pak na Trampov breg, pak Bezjakon. Daje po putiće kroz gustu šumu Milohnon, pak Donjen Jugon i Gornjen Jugon kade je zadnja štacija pred sam finiš. Pul Jug je vavek veselo. Muzikanti žižgaju! Nete Armuniki! Čeka se da gre dan počinut, tako da se ćapa malo škurini, kako bi lepče zgjedalo kada zvončari prihajaju na Breg. I kad pride ta doba, kreće se prema Furićevu. Tamo čekaju divojki z Kunpanije z Halubja, pak ćemo si skupa va velu završnicu.
Lepo nan je bilo va saken kantuniće našega Halubja. Verujen da ste bar va misleh pasali sa sela z manun i spametili se svojeh prijatelji i poznaniki ki va njih bivaju. Ako je i van bilo lepo, onda mi ni žal ča me ovako jako nogi bole!

Za vas pohajala: Nina Dukić