Napisao: Alfred Šaina

Pisat od legendarneh domaćeh muzikanti, a ne spomenut Radota Doričića bilo bi va najmanju ruku nepravedno i nekorektno spofin let keh je pasal z svojun armunikun. Svojni san ćakulal z dragen mi prijatelon Iveton Sankovićen i spićeval ga se neč od žejanskeh zvonačari: od kada se zna za njih, od kada su ovako obučeni i tako daje. Na sa moja pitanja on je odgovaral: „A, jeno petsto let, govore judi“. Onput san ga pital. „Od kada sopu Doričići z zvončari?“ Skroz smeh mi je rekal: „Isto jedno petsto let“. Potla san malo mislel da ni to dugo od istini, aš ne verujen da ćete nać va našen kraje čoveka ki pameti nekega drugega sopca z žejanskemi zvončari nego Radota Doričića. Prvi put je z zvončari sopal 1955. leta. Imel je nanke 14 let, a z gušton sope i dan danas. Pak si zračunajte ki lepi staž je to – za penziju i pol. Danas dobro držeći penzioner mi je rekal: „Znaš nisan ja star, nego san mlad počel sost, zato iman toliko staža“.

Kako ste tako mlad i va vreme kad je živjenje bilo teško počel sost?

Rado:
Ja san bil najmlaji od 9 braće i sestar, a najstareji Josip je mej dva rata već delal va Ičićeh va bolnice kade je upoznal par Lovraci ki su va to vreme sopli armuniki, a neki i va limenoj glazbe. Ti moji stareji brati voleli su muziku pa su nagovorili oca da njin kupi armuniku. Va kuće su bile tri kravi i otac je pristal jednu prodat da se kupi toliko željena armunika. Šli su po nju moj brat Miho (kega puno Matujci pameti kot šofera od školske kurijeri) i jedna stara teta nekamo Mihotićen pul nekeh judi ki su imeli oštariju i su sinu kupovali auto za vozit taxi pak su prodavali armuniku. I tako je ta armunika ku iman dan danas prišla va našu kuću. Počel je II svecki rat i ne znan koliko van je poznato da su Nemci 1944. po lete zapalili celo selo Žejane. Moj otac je arival armuniku stavit va škatulu, zavit va jednu ponjavu i skrit va gnoj tako da je skoro se zgorelo, a armunika je ostala.

Kada ste i kako počeli na nju sost?

Rado: Sopal je moj stareji brat, a ja san samo naslišal. Imel san dobar sluh pak san brzo „lovil“ se pjesmi ke je on sopal. Imel san 11 let kad me je učiteljica ka je bila prijatelica od moje stareje sestri„stavila“ na pozornicu va škole da prvi put z zboron odsopen dve pjesmi. S četrnaest san već sopal z zvončari i tako na sopen dan danas. Moran reć da sa ova leta sopen isključivo na sluh i ne poznan noti. Kašnje je bilo priliki i za vadit se, ma kad se jedanput neš navadiš, pa magari i nepravilno, potla je jako teško ispravit. Ma su zato moj sin Igor i vnuk Mateo školovani muzičari. Igor je storil četire leta klavira i potla još četire leta armuniki pul Mariota Barbisa, a Mateo je nakon osnovne muzičke sada va srednjoj muzičkoj škole ku hodi paralelno z srednjun elektrotehničkun i va oba dve je odličan đak. On sope trumbetu i harmoniku, a ćapal je i cindru.

Ste celo vreme pratil žejanski zvončari?

Rado: San, nego ča. Od 1955. do dan danas ne molujen. Ma san ja sopal i za Halubajski zvončari: od 1964. do 1979. A to je počelo tako da san najprej sopal za maškaranu grupu „Kauboji“ z Brnčić va koj su bili neki moji kolege z tišjarije va Kastve. Jedan kolega tišjar z Rudnega mi je sopal bubanj. Halubjani su to videli i su rekli: „Ti greš s nami sost“ i tako san počel š njimi sost. Ukupno 15 puti san bil š njimi.

Po lete su užali bit tanci, fešti. Ste i tamo sopli?

Rado: Na Žejanah smo vavek samo mi sopli, a na Mune su prihajali, preko z Slovenije, Brkini ih mi zovemo. Nas nisu Munjci nikad oteli,ma užanca je bila da na Munah vavek i mi zasopemo jednu rundu. To su nan dozvolili, aš Slovenci su sopli svoje, a mi smo znali pjesmi ke su naši judi voleli zakantat. Na Žejanah ja ne pametin da je neki drugi sopal. Morda na kakoven pire je sopal neki Škrgat, ma to samo kad smo brat i ja bili zauzeti.

Va naš razgovor uključila se je i Radotova žena Vilma:
Vilma: Na Žejanah je zvončari od 7 do 70 let, ali svirači ni. Vavek su samo Doričići.

Ke pjesmi ste va mladoste sopli i kako ste se navadili?

Rado: Imeli smo doma jedan mići radio. Viš ga na, još ga iman doma. Na baterije, aš struja je na Žejane prišla komać 1961. i smo naslišali talijanske stanice. Najviše smo sopli talijanske: Piemontesina, Tutti mi chiamano bionda, Rosamunda, a kašneje smo naslišali Festival San Remo. Moj pokojni brat Boris je već 1959. prevel neke te talijanske pjesmi kot ča je Marina, Srebrni mjeseče na žejanski i to smo tako kantali, a pred par let smo to čak i snimili na CD jušto onako kako smo onda kantali. Drugo smo navadili tako da su mladići ki su prihajali z vojski sobun „prnesli“ i ličke i bosanske, dalmatinske, slavonske, srbijanske i makedonske pjesmi pak smo se navadili i to sost i kantat. Ja san bil va Srbije va vojske i tamo san navadil „Užičko kolo“ i „Maramica svilenica“. Pokle smo se navadili i moderne od Olivera, Mišota Kovača i drugeh poznateh pjevači.

Do kada ste sopal po pireh?

Rado: Do 1991. Onda san rekal sinu Igoru, ala sad ti preuzmi. On je pokle osnoval i sastav, najprej „4D“ kade su sopli moji dva sina i dva sina od brata Borisa. Kad su šli va vojsku su prestali, a Igor je daje nastavil i evo do dan danas sope va sastave „Fiesta“, a ja još gren sost samo kakovemu rodu ili dobremu prijatelju. Ja san sopal po pireh 35 let. Nisan vodil točnu evidenciju ma to se da cirka zračunat. Sopal san okol 40 piri na leto puta 35 let. To je 1400! Zadnjeh 13 let, do ’91. smo skoro saku subotu sopli piri va restorane „Mira“ pul Rubeš. Ma znaš ča? Onda san se ja počel jadit aš smo morali jako pazit ča ćemo sost i ke pjesmi, da ne bimo slučajno zasopli kakovu „od ća“ srbijansku, al jugoslavensku. Samo hrvacke se je smelo sost, a ča smo mi znali ka pjesma je od kuda.

Vi ste i dobitnik Nagradi za životno djelo ka se dodjeljuje sako leto na susrete harmonikaši va Kastve?

Rado: Ja san bil slavljenik 2006. leta. Onda je bilo točno 55 let da sopen armuniku, a imel san i 65 let. Od onda već ne sopen po teh susreteh, ma želja mi je da gren još jedanput zasost. Volin poć i va Roč kade san čuda let nastupal, zadnji put z sinon i unukon, pa sada zadnja leta va Dražice.

Vi ste i pjevač va vašen forklornen društve kade kantate po starinsku….

Rado: Ja, to je zadnjeh jedno 15 let. Dokla su stari bili živi nisu nas mladeh pustili kantat po starinsku. Užali su nan reć: „Ča ćete vi mladi, vi to ne umete!“ Ma ja san to imeli va uhe i znal san te starinske pjesmi i onda kad su nas počeli zvat na razni susreti i smotri forklora smo šli s početka z starejemi, a pokle smo navadili neki mlaji, tako da je na Žejanah još dan danas živ ta starinski kanat ki mi zovemo „Ojaj ni na“. Moj sin Igor je uspjel to neč napisat, ma ne po klasičneh notah, aš nisu uspjeli ni Ronjgov, ni Kuntarić. Ronjgov je rekal da je to „pretrd oreh“.

Rado Doričić ima i jednu mej zadnjemi cindrami va našen kraje. Malo judi zna da je cindra dvožičani drveni instrument nalik tamburice uz kega se je često va našeh krajeh soplo i kantalo po starinski. Storil ju je sam. Iskoristil je svoj glazbeni talent i tišjarsko umijeće i na osnovu jedne stare cindri ku mu je posudil pokojni Renato Pernić ki je po seleh skupjal stari instrumenti storil je Rado novu novcatu cindru. Mislel san da je uz Franeta Matetića jedini ki još ume na ta instrument sost, ma san se prevaril. Cindru sopu još i Radotov sin Igor i unuk Mateo. Morda da i još ki ma jas ne znan.

Kako ste se navadil sost cindru?

Rado: Va Žejanah su bili jeni otac i sin ki su imeli tu cindru. Otac je užal ovako po večer pomalo cindrat, a on je od nekuda dobival i kartu za cigareti delat pa me je moj otac užal poslat da mu gren zet malo te karti. Tako mi je ta stari jedanput rekal da neka provan malo na cindru sost, aš je znal da sopen armuniku. Malo mi je pokazal i ja san to brzo ćapal. Kad san se vrnul z vojski san šal do njih da mi malo daju tu cindru, ma te cindri ni već bilo. Nisu oteli reć da su je prodali radi mizerije aš ih je bilo sran. Samo da je ni i boh. Kad smo počeli hodit po smotrah folklora ja san se počel raspićevat pul judi ki su od te struki kade bin mogal nabavit cindru. Uputili su me pokojnemu Perniću ki mi je rekal da je on cindru ’61. kupil na Žejanah. I viš, to j’ bila jušto ta cindra. Posudil mi ju je i ja san pomalo po njoj storil ovu moju. Trebalo mi je okol 100 ur s ten da san drevo javorovo 5 let pripravjal i sušil. Iman materijala za storit još 4 cindri. Jednu ću još sigurno storit za muzej na Žejanah.

Cindra ni jedini instrument ki ste storil?

Rado: Storil san ja i pravi profesionalni bubanj. Viš ga tu je. Ima dimenzije, zvuk, jačinu i boju istu kako ki se va butige kupi, a duplo je lagji. Ima samo 6 i pol kil. Upotrebil san takovi materijali i debljini materijali da bude čin lagji.

Vi i popravjate armuniki?

Rado: Ja se već dvajset let bavin s ten. Počel san tako da san majstoru za armuniki pokojnemu Albinotu Valenčiću delal se ono ča mu je od dreva rabilo za popravak. Z vremenon je videl da iman voji i znanja pa mi je počel prenosit tajni svojga zanata. I tako san sada ja i jedini majstor za popravjat armuniki va našen kraje.

Koliko armunik imate?

Rado: Va našoj familije ih je jušto sedan, tako da moren saki dan va šetemane sost na drugu armuniku. Viš na ovde su 4: najstareja je ova trieštinka „Ploner“. Storena je 1907. leta. Nju san restauriral 1994. leta, a najdena je na jednen šufite va Istre va jako lošen stanje. Na nju je dosta teško sost aš ima samo dva reda tipki i hvati su komplicirani. Onda je tu moja prva armunika „Borsini“ za ku san ti povedel kako je „preživela rat“ va gnoje. Ona je proizvedena 1930. leta, a nju san restauriral 2000. „Guerrini“ je moja profesinalna armunika s kun san najviše sopal i sopen dan danas, a kupil san je 1971. leta. Ova zadnja je „Melodija“ ka je od našega forklornega društva i na nju sopen na nastupeh društva. Ostale tri armuniki su pul sina Igora. Na njih sope on i njegov sin Mateo.

I tako nan je Rado opširno opisal svoj glazbeni put kroz življenje i kad san već mislel da mi je se povedel još je na brzinu nadodal: „ I molin te napiši da je sa ta leta uz mane bila i moja žena Vilma ka me je vavek pitala samo dve stvari: „Kad gren i ča ću obuć.“ A ja san pital: „Ča ni pitala kad ćete doma prit?“ Govori Rado: „Nikada! To se pravega muzikanta ne pita.“
A Rado, al pak Cvetko, a more i Floriano je baš od te sorti.

Rado Doričić rojen je 01.10.1941. Užanca bila da se otroku daju dva imena jedno krsno i jedno „svjetovno“. Bilo je va vreme Italije ka ni dozvoljavala da se dece na krste davaju hrvacka imena pak su ga krstili kako Floriano, a doma su ga zvali Rado. Prišla je Jugoslavija. Njin pak nisu bila po gušte talijanska imena pak su mu prvi dokumenti storeni na Cvetko Doričić kako mu i dan danas piše va osobnoj karte.

Tekst izvorno napisan za “Tramontanu”