A ja lepi moji, finilo je i ovo. Mamica moja mila ma je bilo teško, a sad reču da re i huje. Ma kamo huje, kamo? Znate ča ću van reć, mene je zdrajvje ovo leto pustilo naprvo, niš me jako ni bolelo, malo reuma kad daž pada i to je to. Tako da neću puno njurgat nego saku večer reć :“evo, i danaska smo ga zrivali, pasalo je, a jutra kad se stanen, oćutin da će bit boje!“ A onputa naslišan kako ćemo mi opet bit glavni na snege.Ja to ne razumen, nimaš soldi, se si šal va neki minusi, zameš aranžman na 125 rat, nimaš za jist nego vučeš neke sarmi, kobasice, paštu- salsu

. I za ča, da biš rekal da si bil na skijanje, a doma ćeš plakat i računat kako pokrit minus, platit ratu, a jutra ti šef more reć „hvala lepa i doviđenja“.Ma, za majku božju, ča ni boje bit doma, prošećat lungo mare i spat na mire. Te brige te pojedu; pa si nervozan, pa zijaš na decu i na kraje dobiješ čir na želuce. Vrah zel i krizu i dijetu i „bolne rezove“ i skijanja, mi ćemo se malo razveselit z kolači. San napisala  par recepti ki nisu jako dragi, a opet su nekako prigodni za ovi blagdani. Uživajte za ovi blagdani, budite doma z familijun. Ako morete hote na ljetovanje al pak skijanje. Okitite bor, ni važano koliko je tega na stole. Se je dobro kad si z dobremi judi. Spametite se da je vavek oneh kemi je puno huje. Želin van ne samo sretni blagdani leh neka van celo novo leto bude boje, a najviše zdravja.

ovisti kolač će vas prit guštat skupa z  strujun oko 20 kun :

PANETON al KUGLOF

 3 cela jaja

25 dek cukara

1,3 deci ula

1,3 deci mleka

1 pecilni

25 dek cveta

malo soli

korica od limuncina

Jaja i cukar prvo dobro zmiksat. Onputa malo po malo dodavat se drugo i opet dobro zmiksat. Štamp za kuglof al paneton namazat z putron i nutra zilet smesu. Stavit va peć ku smo prej tega steplili na 180 stupnji  i peć jeno 40-45 minuti. Zamete drveni šćapić i malo nabodite va sredu da vidite ako je gotovo. Znet tako da ga obrnemo nopak i posut štap cukar ako ćete.

Ovdeka san računala nekakoveh 30-40 kun (ako ste stavili čokoladu onputa gušta i više):

KUŠINIĆI Z MARMELADUN

1 kilo cveta

pol kila margarina

2 deca  jogurta

malo soli

Umesit se skupa i onputa stavit va frižider testo da se malo stisne (uru vremena). Znet vanka, razvajat (3 mm) i narezat kvadrići ki ćete punit z marmeladun (ako ćete more i Nutella).  Preklopite na pol kot da delate kušinići i malo pritisnite rubi da marmelada ne re vanka. Stavite na pleh na ki ste stavili kartu za peć i pecite na 170 stupnji 10-15 minuti. Kad je gotovo stavite zgora puno štap cukara.

Ova torta jeza oni ki moru malo više potrošit tako oko 60-80 kun (ako ćete na tortu stavit orehi al menduli onda računajte  i kapić više):

ČOKOLADNA TORTA

5 jaj

8 žlic cukara

4 žlice cveta

1 pecilni

15 dek putra

40 dek čokoladi za kuhanje

5 deci slatkega vrhnja  1 dec mleka i malo ruma ako ćete

Biskvit ćemo storit tako da zmiksamo skupa jaja i cukar, onputa cvet i pecilni pa na kraje putar. Stavite va furmu ili okrugli štamp i pecite na 170 stupnji jeno 20 minuti.  Ako imate peć z ventilatoron onputa pecte na 190 stupnji 35-40 minuti. Vavek provajte ako je pečeno z jenen štapićon tamo kade je najdeblje (more i štikadent). Kad je biskvit gotov još dok je tepal zalejte ga s mlekon va ko ste stavili rum al ča drugo.

Prelev od čokoladi : stopite čokoladu i slatko vrhnje i prelejte preko torti. To će se zgledat jako retko al niš za to se će se strdnut. Zgora morete stavit orehi, cizibe, šlag. Se po želje. Takovu tortu stavite va frižider preko noći da se dobro stisne.