Napisao: Alfred Šaina

Danas je petak 13. ivanjskega meseca. Naš fantina je zajdin zapoštal da j’ to „opasan“ dan još da postoji i horor film ki se tako zove. Jas san ga pital: „A znaš ki svetac se slavi na današnji dan?“ Normalno da ni znal. Na 13.6. slavi se Sveti Anton Padovanski. A ki bi mi boje mogal povedet kako se j’ nekad obidovalo takovi blagdani nego barba Frane Matetić. Sel san va auto i … na Zvoneću. Nisan ga našal doma. Govori njegova parona da je šal va lehu nakosit radića. Pak ja za njin va lehu. I evo ga… kosa j’ bila položena na tla, a barba Frane je bacilal okol ruž. Koliko smo se pozdravili zajdin je počel govorit kot  da je znal po ča san prišal: „Danas je Antonjica, doma se jadi žena na me da danas ni užanca delat va grunte, ma san njoj rekal da Antonjica ni zapovedani i veli blagdan pak se malo neč more storit, ono ča je za silu. To, jedanput kad su judi blago imeli, ondat su jako na to pazili, aš to da j’ blagdan od blaga. Magari ovi Sveti Anton ni zaštitnik blaga, leh on drugi Sveti Anton Pustinjak ki se drži na 17. jenara. Ma, sejdin su se držali tega da ta dan blago mora počinut.“

I morali smo poć sest, aš da se ne more tako brzo povedet od stereh užanci ke su va oven štajone, a i „nožina“ da ga boli. Pak smo seli, a barba Frane j’ znel jenu pisanku va ku već dosta vremena zapišuje kako su se obidovale užanci nekad, kako on pameti (a pameti da j’ čudo tega) i kako su njemu stareji povedali. I ne samo užanci. Zapisal je on još čuda tega, ma ni mi se povedel, a neću ni ja van povedet se ča san doznal aš će to morda jedan dan finit va knjigu pak ćemo si čitat, a ostat će i za oneh ki te zad nami prit.
Pak govori Frane Matetić, već par let najstareji va Zvonejsken komune:

TELOVA

 Telova je blagdan ki se ravna proti mesečine, ale proti Uskrsu. Pade desetak dan potla Duhovi i to vavek četrtak. Već prvi dan divojki parićuju robu s kun te jutra oltarić obuć. Zna se ka družina ima najlepču kakovu svetu figuricu pak se gre h njin posudit figuricu ka se stavi na oltarić. Muško delo je bilo parićat kolci, i to užanca j bila da saki gospodar da 11 kolac ki su se zvali i majići. Ti kolci se stave od oltarića do oltarića pak se do crekvi. To se stavi prvi dan, ma kašneje kad sunce malo pade da kolci ne bi povenuli. Večer, na vilju Telovi  ni zvonila „Zdrava Marija“ nego su tri muški ki su bili praktični okol tega tukli po zvone z drvenemi bati. Isto tako, i drugi dan dokle je procešijon hodil mej dva oltarića tukli su z bati po zvone i to je bilo jako lepo čut. Jutro na Telovu muški store oltarići, a zad ten pridu ženske ke te ga čin lepče okrunit.

Kako ča se zna, oltarići su vavek četiri. Jedan je pred „popovun kućun“. Tisti je zvonejski. Drugi je pul „postolaroveh“. To je Sušnjov i Krivajski. Trći je na Kaliće, kada se gre s Klanca gore na Vrtajići. To je Škrapnjakov. Pred „Belgardotovun kućun“ je četrti. On je Gašparov i Perkin. Mladići su se mej sobun dogovorili ki će baldakin nosit, ki ferali, ki će crkvene bandijeri. Narod je mej sobun zibral dva čoveka ki su opravjali posli z crekvun. Oni su se zvali kaštaldi i bili su zaduženi za održavanje crekvi. Na Telovu su morali pokazat na ča su se soldi potrošili.Oni  daju dve litri vina i neč  suho za pojist mušken ki kampanaju, a mladićen ki nose crkvene stvari va procešijone daju neč soldi. Mladići ih ne podele nego pasaju zajdin va oštariju pak su veseli i oni i oštarica.
Potla maši ženske poberu blagoslovjene jasenove kitice, aš va kuće se mora vavek imet neč od blagoslova. Kad je ki bolan ga se potkadi z blagoslovon, al ako je nedajboh, kakov naštrap. Isto se potkadi i blago ako mu je ča, a reču da je dobro i proti grašice. Kolci su se prodali na licitacije za ku su bili zaduženi kaštaldi. Ki je dal najboju cenu pobral je kolci, a soldi su šli za crekav.
Kad se je to zatrlo?
Potla drugega rata je to duralo još morda desetak let, a onda va vreme komunizma kad su judi delali va društveneh i državneh poduzećeh nisu mogli ta dan dobit slobodno i tako se j’ pomalo to zapustilo. Telova, kot Telova postoji ma procešijona već ni.

ANTONJICA

Zač se na Zvonećoj drži kot blagdan i Sveti Anton Pdovanski, a crekav je kot ča znamo posvećena Svetemu Antonu Pustinjaku?

Sveti Anton Padovanski pade na 13.6. i to ni zapovedani blagdan, ma na Zvonećoj se ga je vavek slavilo. Mane su povedeli da je to zato aš kada se je delala crekav prva maša je morala bit na 17. jenara 1862. leta. Crekav je bila gotova ma su se otegnula dela okol oltara pak se ni moglo prvu mašu storit. Da se ne bi čekalo leto dan, prva maša storena je na 13.6.1862. na blagdan ovega drugega Svetega Antona i od onda se i ta dan drži na Zvonećoj kot blagdan, magari ni ta svetac zaštitinik. Da bi se moglo to držat kot blagdan, moral je va ono vreme župan poć biškupu po dozvolu. Zvonećani zovu blagdan na 17.1. Antonja, a na 13.6. Antonjica. Magari ni zapovedani blagdan, ta dan se ni jako delalo, a potla maši je bil samanj i tanac na 2, 3 mesti, već kako su bile oštarije: na Zvonećoj, pul Gašpari i na Zdemere.
Na 17. jenara pust počne va našen kraje?
Ja. Ši sada, ma tako prej ni bilo. Prej se niki ne bi bil usudil va rog zatulit, al zvonci oprtit i nedaj bože krabuju na lice stavit prej nego Antonja pasa. Komać drugi dan moglo se je počet z pusnemi norijami.

Tako san, viš još neč novega doznal. Ma da kemu rečen da bi Pust moral počet na 18. jenara bi rekli da san nem. A rečite mi malo ke su se dela obavjala okol Antonjice?

Zad Antonjicun se je čekal prvi daž. Zvali su ga „daž kapuzar“ aš se j’ potla tega dažja počelo sadit kapuz. Ovo leto pada saki dan „daž kapuzar“ pak se ne more ni delat niš va vrte.

LETNJA IVANJA

Kad se spomene Ivanja mane prvu stvar domisli kad san bil otrok da smo Rukafce palili kres ki je moral bit čin veći…

Ja, ma i to se je zatrlo. Proval san ja pred dvajsetak let decu namutit da storimo kres, ma i to je malo duralo. Treda ni gušta kad se nimaš kemu rugat.

Zač rugat?

Kad san ja bil mlad ondat je sako mesto imelo svoj kres: Zvoneća svoj, Gašpari svoj, Sušnji, Perka, Škrapna, Kriva. To su delala deca i to od prašća i od onega ča je kravan ostalo va jaslah od krmi, ča blago ni pojilo. To se je spravjalo na jedan kup i onda se je na Ivanju se skupa važgalo. Sako mesto je mislelo da je njih kres boji i lepči pak su se rugali susedon. Mi od Gašpari zmerali smo Zvonećanon: „Zvonećani – pol stomanji“ , „Zvonećanski fanti – brageše na tiranti, a va žepe niš nego šmrkav facolić“, a oni su nan: „Gašpari na drekeh zaspali“.
Okol Ivanji pade i Sveti Vid kada su črešnje zrele pak se reče: „Sveti Vid črešnje v rit – Sveti Ivan črešnje z riti van“.
Ma još se je veći kres delal na Petrovu, aš Petrova je bil zapovedani blagdan pa je bilo više vremena za parićat ga.
Ivanja je blagdan Svetega Ivana Krstitelja i pade na 24.6. ma va našen komune se ni posebno slavil.

PETROVA

Petrova je, zna se, rukavački blagdan. Rukavac ima crekav Svetega Luki, i kapelicu Svetega Roka ki je Rukavac škapulal od koleri pred 150 let. Blagdan Svetega Petra i Pavla ki pade na 29.6. drži se već čuda let, a va crekve je oltar posvećen ten dven apostolon. Va crekve je kantana maša, a potla fešta, tanac. Je bilo i nekad tako?

Ja, tako j’ nekad bilo. Ma danas ni tako kot govoriš. Prej se je Petrova držala kot blagdan baš na ta dan, a ne kot danas, subotu, nedeju i pondejak ki su blizu Petrove.
Rukafce je užal bit veli samanj. Ćići su prišli z tovarići i prnesli za prodat ofčji sir i skutu, trgofci z kosami i brusi. Užali su bit i najmanje dva tanca pak se mladetina zadrži do kasna, a neki i do sunca. Drugi dan je posajmica pak lih nastave. Dogodi se ki do kasna ostane da proti jutru, kad gre doma, mlekarice trefi. To se je i mane dogodilo.

Potla Petrovi počne i košnja?

Ja. Košnja je počela najprej okol kući. Sprotu se j’ kosilo blagu za krmu, a potla Petrovi se je hodilo va senokoši ke su bile daje od kući. Gledalo se je da gre isti dan čin više gospodari, aš su se jedan z drugen kunfinali pak da ne maste po tujen su otkosili put do svojga. Već koliko je imel ki kosit i koliko ih je bilo va familije onda se je zelo težaki. Kade su bili težaki je bilo i boje za pojist, a ako je družina sama kosila onda je bilo ča ši ši.

Ča je to bilo boje?

Za drugu rušnju (aš prva se j’ doma pojila) je bila juha od frmentene muki zasmočena z mastun i malo špeha pofriganega. S ten je bila i palenta ka se je polela s tun juhun pak se je to se skupa zvalo „polevača“. Za obed je bila repa, al kapuz, a potla tega makaruni z slanen meson al z gulašon. To su ženske prnesle. Dokla su muški jili one su žele z srpon okol kamiki i kamo kosa ni mogla prit. Onda se j’ požela saka travica, a ne kot danas da ni ki nanke okol kući pokosit. Z vozi, ale na bremena se j to doma pejalo i spravilo va skadnji pak se j’ kroz zimu blago hranilo.

Još nan je tega povedal barba Frane. I sreća da je se to zapisal. Napisal je on i roman „Zvoneća svojni“. Z pisanjen krati noći, aš da j’ od mladega slabega sna. Sreća da je, aš da ni čuda od nas ne bi ni znalo kako se je va oveh krajeh svojni živelo.